Հայ և թուրք երիտասարդները կգնան 1915-ին գաղթած հայերի ճանապարհով

Թուրքիայից և Հայաստանից 20 երիտասարդներ 1915-ին Անատոլիայից (Արևմտյան Հայաստանից-Ակունքի խմբ.) գաղթած հայերի անցած ճանապարհով են անցնելու, գրում է «Հայ թերթը»։

Հայոց ցեղասպանության 100-րդ տարում Թուրքիայից և Հայաստանից երիտասարդները հաջորդ շաբաթ շրջագայելու են և պատմական աշխատանք են իրականացնելու։

Նախագիծը ֆինանսավորելու է Գերմանիայի կառավարությունը, իրականացվելու է Թուրքիայի պատմության հիմնադրամի ու Հայաստանի Էթնիկ ուսումնասիրությունների «Հազարաշեն» կենտրոնի ջանքերով։

Նախագծի շրջանակներում 20 հոգանոց խումբը 1915-ի ճանապարհներով է անցնելու։ Ներկա են լինելու նաև երկու երկրների ներկայացուցիչ լրագրողներ ու գրողներ։
Ավելի ուշ երիտասարդների լուսանկարած նկարները ցուցադրվելու են մի ցուցահանդեսի շրջանակներում։

Նախագծի հայաստանյան մասը տեղի է ունենալու սեպտեմբերի 13-23-ը՝ Երևան, Թալին, Գյումրի ու Էջմիածին քաղաքներում։ Այստեղ երիտասարդներն ուսումնասիրություններ են իրականացնելու, լինելու են վանքերում, եկեղեցիներում, որբանոցներում, հանդիպելու են գաղթած ընտանիքների զավակների ու թոռների հետ։

Թուրքիայի փուլը տեղի է ունենալու մյուս տարի։ Այդ ժամանակ երիտասարդները լինելու են Թունջելի (Դերսիմ -Ակունքի խմբ.), Երզնկա, Մուշ, Աղրը (Արարատ-Ակունքի խմբ.), Սըվաս (Սեբաստիա-Ակունքի խմբ.) շրջաններում ու փնտրելու են այնտեղ բնակված հայերի հետքերը։

Նախագծի նպատակը ժողովրդավարական երկխոսության ստեղծումն է, խաղաղ համակեցությունը, պատմության խնդիրներին մոտենալու ուղիների որոնումը։

http://www.tert.am/am/news/2015/09/04/1915/1781384