Քոբանիից Թուրքիա գնացած հայ ընտանիքները շուտով տեղափոխվելու են Հայաստան

Սիրիական Քոբանիի մարտերից փախչելով` Թուրքիայում ապաստանած հայ ընտանիքներից երկուսն այս շաբաթվա վերջին մեկնելու են Հայաստան։ Այդ մասին հաղորդում է Պոլսո հայոց պատրիարքարանի ֆեյսբուքյան էջը։

Ավելի վաղ հաղորդվել էր, որ երեք հայ ընտանիքներ գտնվում են Աղետների և արտակարգ պատահարների թուրքական կենտրոնի կողմից Սուրուչ քաղաքում հիմնված վրանային ճամբարում, և այնտեղ անցյալ ամիս նրանց այցելել էր Պոլսո հայոց պատրիարքարանի փոխանորդ Արամ արքեպիսկոպոս Աթեշյանը։

Ընտանիքները Հայաստան տեղափոխվելու և մշտական բնակություն հաստատելու ցանկություն էին հայտնել։

Արամ արքեպիսկոպոս Աթեշյանը նրանց խնդրանքն իրագործելու համար կապ է հաստատել պատկան մարմինների հետ, խոսել է Արտգործնախարարության պաշտոնյաների հետ, որպեսզի լուծվի երկրից նրանց դուրս գալու հարցն, ու գործընթացն արագացվի։

Արամ արքեպիսկոպոսը կապվել է նաև ՀՀ սփյուռքի նախարարության հետ, որպեսզի ընտանիքներին Հայաստան մուտք գործելու հնարավորություն տրվի։

Այս ընթացքում ընտանիքներից մեկը հրաժարվել է Հայաստան մեկնելու մտքից, սակայն մյուս երկու ընտանիքները, Արամ արքեպիսկոպոս Աթեշյանի ուղեկցությամբ, օգոստոսի 30-ին ժամանելու են Երևան։

http://www.tert.am/am/news/2015/08/27/kobani/1774348