Թուրքիայում պաշտոնապես նշանակվել է արտահերթ ընտրության օրը

Թուրքիայի Կենտրոնական ընտրական հանձնաժողովի նախագահ Սադի Գյուվենը հայտարարել է, թե Թուրքիայի քաղաքացիները խորհրդարանական արտահերթ ընտրությունների են գնալու 2015-ի նոյեմբերի 1-ին։

Թուրքական Sözcü պարբերականի փոխանցմամբ՝ Թուրքիայի Կենտրոնական ընտրական հանձնաժողովի նախագահի հայտարարության մեջ նշվել է, թե հաշվի առնելով ձմռան մոտենալը եւ առաջնորդվելով Սահմանադրության համապատասխան կետերով՝ որոշվել է խորհրդարանական արտահերթ ընտրություններն անցկացնել նոյեմբերի 1-ին։

Նշենք, որ Էրդողանն արդեն Դավութօղլուին հանձնարարել է ժամանակավոր կառավարություն կազմել։ Նախարարները նշանակվելու են Արդարություն եւ զարգացում, քրդական Ժողովուրդների դեմոկրատական կուսակցության եւ անկախ պատգամավորներից։

Խորհրդարանական մյուս երկու՝ Ժողովրդահանրապետական եւ Ազգայնական շարժում կուսակցությունները հայտարարել են, թե իրենք տեղ չեն զբաղեցնելու ժամանակավոր կառավարության կազմում։

Ժամանակավոր կառավարությունը կղեկավարի երկիրը մինչ արտահերթ ընտրություններից հետո նոր կառավարության ձեւավորումը։

http://news.am/arm/news/283094.html