«Արմեն» որբանոցի վրա իրականացված հարձակումը բացահայտելն իշխանությունների գործն է. Թուրքիայի հայ պատգամավոր

Թուրքիայի ընդդիմադիր Ժողովրդահանրապետական կուսակցության՝ Ստամբուլից ընտրված հայ պատգամավոր Սելինա Դողանն «Արմեն» որբանոց-ճամբարում հերթապահողների վրա իրականացված հարձակման վերաբերյալ հայտարարությամբ է հանդես եկել։
Ինչպես տեղեկացնում է «Ակօս»-ը, նա կոչ է արել առանց ժամանակ կորցնելու բացահայտել մեղավորներին։
«Ոչ միայն Թուրքիայում ապրող հայերի, այլև բոլոր ժողովրդավարական ուժերի համար խորհրդանիշ դարձած «Արմեն» ճամբարը չքանդելու համար հերթապահող կամավորների վրա իրականացված հարձակումից հետո 3 մարդ հիվանդանոց է տեղափոխվել»,- գրել է նա։
Դողանը հիշեցրել է, որ ընտրություններից առաջ` իշխող Արդարություն և զարգացում կուսակցությունը խոստացել էր լուծել խնդիրը։
«Մեղավորին կամ մեղավորներին գտնելը և մնացած պատասխանատվությունը իշխանության ուսերին է։ Հարձակվողներին գտնելն ու տեղի ունեցածը բացահայտելը կկանխի ապագայում նման դեպքերի կրկնությունը։ Հրանտ Դինքի և այլ հայ որբերի կողմից կառուցված, հանրության համար այդքան կարևոր համարվող «Արմեն» ճամբարը, առանց ժամանակ կորցնելու, պետք է հանձնվի իրական տերերին»,-գրել է հայ պատգամավորը։
Հիշեցնենք, որ հայկական որբանոց-ճամբարի քանդման դեմ բողոքող մարդկանց վրա հարձակում էր իրականացվել։ Նրանցից ոմանք մահակներով ծեծի էին ենթարկվել։
http://www.tert.am/am/news/2015/08/14/selina-dogan/1763813