Թուրքիայում հայկական վերակառուցված եկեղեցի է վերաբացվել

Ստամբուլի Քարթալ շրջանում վերակառուցվել ու վերաբացվել է Սուրբ Նշան հայկական եկեղեցին:

Ինչպես տեղեկացնում է TimeTurk-ը, մզկիթներին ու եկեղեցիներին տրամադրվող աջակցության շրջանակում Քարթալի համայնքապետարանը վերակառուցել է նաև այս եկեղեցին, իսկ բացմանը մասնակցել է նաև համայնքապետ Ալթինոք Օզը:

Եկեղեցու վերակառուցման աշխատանքները տևել են մոտ երկու տարի:

Վերաբացման արարողությանը ներկա է եղել նաև Քարթալի քաղաքային խորհրդի ղեկավարի թեկնածու Ալի Էքբեր Շահինը, Պոլսո պատրիարքարանի առաջնորդի փոխանորդ Արամ Աթեշյանը, հայ հոգևորականներ, թուրք և հայ քաղաքացիներ։

Արամ արքեպիսկոպոս Աթեշյանը բացման արարողության ընթացքում ունեցած իր ելույթում խոսել է աշխարհում կրոնների միջև առկա բախումների մասին:

Անդրադառնալով Թուրքիայում վերջին օրերին տեղի ունեցող ահաբեկչական գործողություններին՝ Աթեշյանը մաղթել է, որ դրանք շուտ վերջանան: Աթեշյանը նաև հայ համայնքի անունից շնորհակալություն է հայտնել Օզին՝ եկեղեցու վերակառուցմանն աջակցելու համար:

http://www.tert.am/am/news/2015/08/11/church/1760483