Ստամբուլահայ կանանց սպանության մեջ մեղադրվող հայը վերջապես պատմել է իրականությունը

Ստամբուլահայ Մարիցա Քյուչուքի սպանության մեղադրանքով կալանված Մուրադ Նազարյանն ի վերջո փաստաբան Էրեն Քեսքինին պատմել է այսքան ժամանակ անհայտ դրվագներ։
Ինչպես տեղեկացնում է Ստամբուլի հայկական «Ակօս»-ը, Մարիցա Քյուչուքի սպանության մեջ մեղադրվող Մուրադ Նազարյանն իրեն տեսակցության եկած ընտանիքի անդամներին եւ փաստաբան Էրեն Քեսքինին վերջապես պատմել է սպանության օրը տեղի ունեցած իրադարձությունները։
Նազարյանը նշել է, որ իր հետ հանդիպել էր Ա. անունով մի տղամարդ, ով ինչ-որ սրճարան էր աշխատեցնում։ Այդ տղամարդը սպանության օրը Մուրադ Նազարյանին հրավիրել է հանդիպել այգում։
Մուրադ Նազարյանը գնացել է այգի, որտեղ ասված ժամին մոտեցել է ջրեր առաքող մի մեքենա, որի միջից 3 հոգի նրան կանչել են անուն-ազգանունով։ Նազարյանը վախեցել է՝ մտածելով, որ նրանք ոստիկան են, եւ նրանց հետ նստել է մեքենա։ Անծանոթները նրան ինչ-որ հաբ են խմեցրել։
Նրան տարել են Մարիցա Քյուչուքի շենքի մոտ եւ ասել մտնել կոնկրետ բնակարանը։ Իսկ 3 հոգին շենքի հետեւի մասից են ներս մտել։
Երբ Նազարյանը մտել է ներս, անծանոթները սկսել են հարձակվել տարեց կնոջ վրա, որից հետո Նազարյանն արտասվելով փախչել է։
Նշենք, որ 2012-ի դեկտեմբերին եւ 2013-ի հունվարին Ստամբուլի` հայերով բնակեցված Սամաթյա թաղամասում տարեց հայ կանանց դեմ հարձակումներ էին տեղի ունեցել։ Այդ հարձակումների կատարման մեջ կասկածանքով ձերբակալվել էր ստամբուլահայ Մուրադ Նազարյանը։
Մուրադ Նազարյանին ճանաչողները պնդում են, թե նա շատ հանգիստ անձնավորություն էր, եւ անհավատալի է, որ նման բանի մեջ են մեղադրում նրան։
http://news.am/arm/news/280359.html