Թուրքիայում հայերն ուխտ են կատարել Մարութա սարում

Ներկայում Թուրքիայի տարածքում գտնվող Սասունի Մարութա (Մարաթուկ) սարի ամենամյա ուխտին են մասնակցել աշխարհի տարբեր երկրներից ժամանած հայեր:

Թուրքական Batmançağdaş կայքի փոխանցմամբ՝ ամեն տարի հուլիսի վերջին իրականացվող Մարութա սարի վերելքն այս տարի եւս տեղի է ունեցել։ Աշխարհի տարբեր կողմերից Սասուն եկած հայերը բարձրացել են Մարութա լեռան գագաթ, մոմ վառել եւ աղոթել այնտեղ գտնվող Սուրբ Աստվածածին եկեղեցում։

Սասունի քաղաքապետը նշել է, թե ամեն ինչ արել են, որպեսզի Ստամբուլից եւ արտասահմանից եկած հայերի ուխտը հաջող անցնի։ «Որպես տեղական իշխանություններ, մենք Մարութա լեռան հետ կապված նախագծեր ունենք, այդ թվում հյուրատուն ենք կառուցելու»,-ասել է Սասունի քաղաքապետը։

Նշենք, որ Մարութա սարը գտնվում է Արեւմտյան Հայաստանի Սասուն գավառում եւ եղել է սասունցիների սիրած եւ պաշտելի սարը, որը կոչվել է նաեւ Մարաթուկ։

http://news.am/arm/news/280206.html