PKK-ի և թուրք ոստիկանների միջև տարբեր նահանգներում բախումներ են գրանցվել. կան զոհեր

Ադանայում ոստիկանության շենքի վրա իրականացված հարձակման հետևանքով երկու թուրք ոստիկան է սպանվել։
Ինչպես տեղեկացնում է CNNTurk-ը, բախումների ընթացքում Քուրդիստանի աշխատավորական կուսակցության՝ PKK-ի երկու զինյալ է սպանվել։ Այժմ ոստիկանները որոնում են փախուստի դիմած երկու այլ PKK-ականի։
Միջադեպը տեղի է ունեցել գիշերը՝ տեղական ժամանակով 02։35-ին։
Սպանված քուրդ զինյալների մոտից 2 ինքնաձիգ, 1 ատրճանակ և 3 ձեռքի նռնակ է հայտնաբերվել։
Հարձակում է տեղի ունեցել նաև Դիարբեքիրում ոստիկանական շենքի վրա։ Այս դեպքում զինյալները պայթուցիկ սարք են գործարկել, ինչի հետևանքով վիրավորվել է 2 անցորդ։
Բիթլիսի Գյուրոյմաք շրջանի ոստիկանական շենքի ուղղությամբ էլ PKK զինյալները հրթիռ են նետել։
Այս դեպքում տուժածներ չեն գրանցվել, իսկ հարձակումից հետո անվտանգության ուժերը պատասխան կրակ են բացել, և փոխհրաձգություն է սկսվել։
Մեկ այլ միջադեպ էլ գրանցվել է Հաքքարի նահանգում։ Չուքուրջայի ճանապարհին` կամրջի մոտ, քուրդ զինյալները 5 ժամ փակել են ճանապարհն ու ստուգել են անցորդների անձնագրերը, ինչից հետո 2 ավտոմեքենա է հրկիզվել։
http://www.tert.am/am/news/2015/07/31/turkey-pkk/1751789