«Ակունքի» հարցազրույցը Գրանադայում Հայոց ցեղասպանության 100-ամյա տարելիցին նվիրված ցուցահանդեսի կազմակերպիչ Գոհար Վահանյանի հետ

Հուլիսի 17-ին Իսպանիայի Գրանադա քաղաքում բացվել է Հայոց ցեղասպանության 100-ամյա տարելիցին նվիրված ցուցահանդես: Akunq.net-ը զրուցեց այդ ցուցահանդեսի կազմակերպիչ և համակարգող Գոհար Վահանյանի հետ:

-Գոհա’ր, պատմեք, խնդրեմ, այդ միջոցառման մասին:

-Հուլիսի 17-ին Գրանադայի արքեպիսկոպոսի պալատում, Հայոց ցեղասպանության հարյուրերորդ տարելիցի կապակցությամբ, բացվեց «Գողացված մանկություն» խորագրով ցուցահանդեսը: Այն երկրորդ ցուցահանդեսն է՝ նվիրված Ցեղասպանության զոհերի հիշատակին, որ իմ և ամուսնուս՝ Հայկ Գրիգորյանի նախաձեռնությամբ այս տարի կազմակերպվել է Գրանադայի արքեպիսկոպոսարանում:

-Իսկ ի՞նչ խորագիր ուներ առաջին ցուցահանդեսը:

-Առաջինը լուսանկարների ցուցահանդես էր և կրում էր «Հայոց մշակութային ցեղասպանություն. մինչ և հետո» խորագիրը: Մտահաղացումը մերն էր, բայց այն կյանքի կոչվեց հուշարձանագետ Սամվել Կարապետյանի հետ համագործակցության արդյունքում: Նա մեզ տրամադրեց ցուցահանդեսի նյութերը՝ Արևմտյան Հայաստանում գտնվող հուշարձանների՝ ՀՃՈՒՀ-ի արխիվային և իր կողմից արված լուսանկարները, ինչպես նաև` այդ իսկ նյութերի հիման վրա նկարահանված «Եղեռն եղեռնից հետո» վավերագրական ֆիլմը, որը ցուցադրվեց ամբողջ ցուցահանդեսի ընթացքում: Ի դեպ՝ այս ցուցահանդեսը սեպտեմբեր-հոկտեմբեր ամիսներին կներկայացվի նաև Տոլեդոյում և Տալավեր դե լա Ռեյնայում:

-Ովքե՞ր էին ցուցահանդեսի մասնակիցները:

-«Գողացված մանկություն» ցուցահանդեսին մասնակցում էին 14 տաղանդավոր հայ ժամանակակից նկարիչներ, ովքեր ապրում և ստեղծագործում են ինչպես ՀՀ-ում, այնպես էլ ԱՄՆ-ում, Ֆրանսիայում, Իտալիայում և Իսպանիայում: Հանդիսատեսի ուշադրությանը ներկայացրեցինք 63 աշխատանք՝ կատարված գեղանկարչական տարբեր տեխնիկաներով՝ ընդհուպ մինչև տպագրական գրաֆիկա: Կային աշխատանքներ, որ հատուկ արվել էին այս ցուցահանդեսի համար: Հիշատակման են արժանի հատկապես Արծրուն Ապրեսյանի 3 հիասքանչ աշխատանքները՝ «Վերջին նավը», «Ճանապարհ» և «Հին լուսանկար»: Վերջինս ընտրվեց որպես ցուցահանդեսի այցեքարտ և զետեղվեց գովազդային պաստառների և հրավիրատոմսերի վրա: Ցուցահանդեսի բոլոր մասնակիցները, անկասկած, մեծ վարպետներ են: Շատ տպավորիչ աշխատանքներ է ներկայացնրել Սևակ Գրիգորյանը՝ «1915»: Ուզում եմ իմ խորին շնորհակալությունը հայտնել բոլորին` իրենց մասնակցության համար և նշել նրանց անունները՝ Արծրուն Ապրեսյան, Տիգրան Ասատրյան, Նարեկ Բաբումյան, Հայկ Գրիգորյան (Իսպանիա), Սևակ Գրիգորյան (Իտալիա), Սամվել Համբարձումյան (ԱՄՆ), Աշոտ Հարությունյան, Արթուր Հակոբյան, Տիգրան Սահակյան, Եվգենիա Սարգսյան Սարե (Ֆրանսիա), Մելիք Շահնազարյան, Արման Վահանյան, Արմեն Վահրամյան, Արամ Վարդանով (ԱՄՆ):

-Վերադառանք երկրորդ ցուցահանդեսին: Ո՞րն է այս միջոցառման հիմնական թեման:

-Այս ցուցահանդեսի հիմնական թեման Հայոց ցեղասպանության որբերը և միսիոներներն են, ովքեր իրենց կյանքը նվիրեցին այդ դժբախտ մանուկներին խնամելուն, կրթելուն և այդ փոքրիկ սրտերում ապագայի հանդեպ հույս սերմանելուն: Ներկայացված են որբերի և որբանոցների հին լուսանկարներ, ինչպես նաև միսիոներներ Յակոբ Կյունցլերի, Բոդիլ Բյորնի, Թեյսի Ադկինսոնի, Աննա Հեդվիգ Բյուլի, Կարեն Յեպի և այլոց կենսագրությունները և նրանց որբախնամ գործունեության մասին տեղեկություններ:

-Ո՞վ է ձեզ հովանավորում նման միջոցառումների կազմակերպման հարցում: Ունե՞ք, արդյոք, ֆինանսական աղբյուրներ: Հայկական համայնքը որևէ կերպ աջակցո՞ւմ է:

-«Գողացված մանկություն» ցուցահանդեսը կազմակերպել ենք Քրիստոնեա արևելքի ուսումնասիրության կենտրոնի (Գրանադա), Մշակութային կենտրոն Նուևո Ինիսիոյի (Գրանադա) և Հարյուրամյակի միջոցառումները համակարգող կոմիտեի հետ համագործակցությամբ:
Ցուցահանդեսը անց է կացվում Գրանադայի արքեպիսկոպոս, բարձրաշնորհ Տ. Ֆրանսիսկո Խավիեր Մարտինես Ֆերնանդեսի բարձր հովանու ներքո: Օգտվելով առիթից՝ ուզում եմ իմ խորին շնորհակալությունը հայտնել նրան: Ինչ վերաբերվում է հայ հովանավորներին, ավաղ, մենք դիմել ենք մի քանի հայտնի հայազգի մարդկանց, ինչպես նաև Իսպանիայում ՀՀ դեսպանատուն, որոնք, սակայն, կամ չեն արձագանքել, կամ մերժել են: Վերոնշյալ ցուցահանդեսների բոլոր ծախսերը հոգացել ենք ամուսինս և ես` մեր հնարավորությունների սահմաններում ամեն դժվարություն հաղթահարելով, սեփական միջոցներ տրամադրելով այս գործին և այլևս չապավինելով մեր մեծահարուստների մեկենասությանը կամ դեսպանատան աջակցությանը: Ցավով եմ նշում սա:

-Գոհար, իսկ ի՞նչ արձագանքներ եք ստանում: Ովքե՞ր են ցուցահանդեսի այցելուները: Հայեր գալի՞ս են:

-Գրանադայում չկա հայկական համայնք, մեկ-երկու ընտանիք է միայն, սակայն մեծ թվով մարդիկ են այցելում, դիտում, հետաքրքիր գրառումներ կատարում մեր մատյանում: Նման միջոցառումները լուսաբանվում են տեղական ռադիոյով և հեռուստատեսությամբ, արձագանքը միշտ դրական է:

–Մինչև ե՞րբ բաց կլինի ցուցահանդեսը:

-Այն կտևի մինչև հոկտեմբերի 16-ը: Այցելության ժամերն են 10:00-13:30, երկուշաբթիից ուրբաթ:

-Այլ ծրագրեր ունե՞ք:

-Ծրագրերը շատ են, սակայն անդրադառնամ միայն առաջիկայում իրականացվելիք միջոցառումներին: Սեպտեմբեր ամսին կցուցադրենք Բելլա Բաբլումյանի «Հայաստանը դեռ երգում է մեր սրտերում» և Պարետ Մարոնյանի «Ցեղասպանության որբեր» վավերագրական ֆիլմերը: Ցեղասպանության հարյուրամյա տարելիցին նվիրված միջոցառումերի շարքը կեզրափակենք կոմիտասյան համերգով՝ հայաստանաբնակ սոպրանո Հասմիկ Բաղդասարյանի կատարմամբ, որը տեղի կունենա նոյեմբեր ամսին:

-Շնորհակալություն հարցազրույցի համար և հաջողություն Ձեր բոլոր նախաձեռնություններին:

-Ես էլ եմ շատ շնորհակալ:

Մելինե Անումյան
Akunq.net