Թուրքիայում իսլամիստների դեմ գործողություններն աչքակապություն են. թուրք լրագրող

Թուրքական Sözcü պարբերականի թղթակից Սայգը Օզթուրքը հայտնել է, թե «Իսլամական պետության» դեմ թուրքական ոստիկանության գործողությունները աչքակապություն են:

Թուրքիայի ոստիկանության հետ երկար ժամանակ թղթակցած Սայգը Օզթուրքը նշել է, թե Սիրիայի հետ սահմանակից Ուրֆայում, որտեղ տեղի ունեցավ վերջին խոշոր ահաբեկչությունը, ոստիկանության համակարգում իսլամիստների հարցերով մասնագիտացած որեւէ աշխատակից չկա:

Նա շեշտել է, թե «Իսլամական պետության» դեմ գործողությունների ժամանակ ձերբակալվածներին ընդամենը հարցաքննելու են` տեղեկություններ ստանալու նպատակով, իսկ գործողություններն ընդամենը ժողովրդի մեջ զայրույթը մեղմելու համար են անում:

Նշենք, որ հուլիսի 20-ին Թուրքիայի տարբեր վայրերից ահաբեկչության դեմ պայքարող հեղափոխական հայացքներով մի խումբ երիտասարդներ Քոբանիի երեխաներին խաղալիքներ ու հագուստներ էին ցանկանում տանել, սակայն թուրքական իշխանությունները թույլ չեն տվել անցնել սահմանը, որից հետո նրանք Սուրուչի շրջանում մամուլի ասուլիս են հրավիրում: Հենց ասուլիսի ժամանակ մահապարտ ահաբեկիչը մտնում է նրանց մեջ եւ պայթեցնում իրեն` կոտորելով 32 երիտասարդի:

Այս պայթյունից հետո Թուրքիան փորձում է տպավորություն ստեղծել, թե պայքարում է «Իսլամական պետության» դեմ:

http://news.am/arm/news/278541.html