Ի՞նչ պայմաններով է Թուրքիան ԱՄՆ-ի օդուժին տրամադրել Ինջիրլիքի ռազմաբազան. նոր մանրամասներ

Թուրքիայի կողմից Ինջիրլիք ռազմաբազան ԱՄՆ-ի կործանիչներին տրամադրելու պայմանների վերաբերյալ մանրամասներ են ի հայտ եկել:

Ինչպես տեղեկացնում է Hürriyet թերթի կայքը, նախատեսվում է Սիրիայի տարածքում՝ Թուրքիայի սահմանից 90 կմ հեռավորության գոտում, ոչ թռիչքային գոտի հայտարարել:

Նշվում է նաև Թուրքիային հարակից շրջանները իսլամիստ ահաբեկիչների վերահսկողությանը չհանձնելու անհրաժեշտության մասին, քանի որ հակառակ դեպքում դեպի Թուրքիա փախստականների հոսքի նոր ալիք կսկսվի:
Անհրաժեշտության դեպքում գործողություններ են իրականացնելու նաև թուրքական ռազմական օդանավերը:
Անվտանգության գոտու ստեղծումից հետո այնտեղ արգելվելու են սիրիական ռեժիմին պատկանող ինքնաթիռների թռիչքները:

Սիրիայում կռվող քրդերը թուրքական ուժերի ուշադրության կենտրոնում չեն լինի այնքան ժամանակ, քանի դեռ նրանց կողմից Թուրքիայի սահմանին ուղղակիորեն սպառնացող վտանգ չկա:

Անհրաժեշտության դեպքում ԱՄՆ-ի ու կոալիցիայի ուժերը Ինջիրլիքից բացի` իրավունք են ունենալու օգտագործել նաև Բաթմանի, Դիարբեքիրի ու Մալաթիայի բազաները:

Հիշեցնենք, որ ավելի վաղ տեղեկություն էր տարածվել այն մասին, որ երկարատև բանակցություններից հետո ԱՄՆ-ն և Թուրքիան համաձայնություն են ձեռք բերել առ այն, որ Թուրքիան Ինջիրլիքի ռազմաօդային բազան կտրամադրի ամերիկյան օդուժին:

http://www.tert.am/am/news/2015/07/24/usa/1743797