Գյուլենը կարտաքսվի ԱՄՆ-ից

PanARMENIAN.Net – ԱՄՆ Փենսիլվանիայի նահանգում բնակվող ազդեցիկ իսլամիստ քարոզիչ, «Հիզմեթ» հասարակական շարժման առաջնորդ Ֆեթուլլահ Գյուլենը կարտաքսվի ԱՄՆ-ից, հայտնում է Vesti.Az-ը` թուրքական աղբյուրների վրա հղումով:

Ըստ հաղորդագրության, առաջիկա ամիսներին Գյուլենը կարող է հաստատվել Հարավային Աֆրիկայում: «Հիզմեթի» ղեկավարությանը մոտ հավաստի աղբյուրներից հայտնի է դարձել, որ կազմակերպության առաջնորդներն արդեն տեղ են փնտրում Յոհանեսբուրգում կազմակերպության կենտրոնակայանի համար:

Հատկանշական է, որ շարժման անդամներն արդեն հանդիպում են ունեցել ՀԱՀ նախագահ Զումա Ջեյքոբի հետ, որը մերժել է նրանց առաջարկը, սակայն «Հիզմեթը» մտադիր է գոնե ապրելու իրավունք ստանալ Գյուլենի համար` բազմամիլիոնանոց ներդրումներ խոստանալով ՀԱՀ ղեկավարությանը:

ՀԱՀ իշխանությունների հետ բանակցությունների հաջորդ փուլը կարող է տեղի ունենալ արդեն օգոստոսին: Ֆեթուլլահ Գյուլենը համարվում է Թուրքիայի նախագահ Ռեջեփ Թայիփ Էրդողանիհակառակորդն ու ընդդիմախոսը, նա նաև Թուրքիայի գրողների և լրագրողների հիմնադրամի հիմնադիրն է: Ավելի վաղ Թուրքիայի նախագահը հայտարարել էր, որ ԱՄՆ-ում սկսվել է երկրից Գյուլենին արտաքսելու իրավաբանական գործընթացը:

2014-ի դեկտեմբերի 25-ին Էրդողանը մեղադրեց Թուրքիայի Գիտատեխնիկական հետազոտությունները խորհրդի (ТUBITAK) անդամներին թուրքական ղեկավարության բանակցությունների գաղտնալսումը կազմակերպելու մեջ: Նա հավելեց, որ «զուգահեռ կառույցի» մասնակիցները, որոնք մշակում էին հեռախոսազրույցների թվայնացման համակարգը, իրենք են օգտագործել այն գաղտնալսման համար: Սակայն Թուրքիան, ըստ նախագահի, հաղթեց «զուգահեռ պետության» դեմ պայքարում: Փետրվարի 25-ին թուրքական ԶԼՄ-ները տեղեկություններ տարածեցին, որ 2011-ին «Salam» կազմակերպության դեմ Ստամբուլի դատախազության հակաահաբեկչական գործողության ժամանակ գաղտնալսվել են մոտ 7 հազար մարդու հեռախոսազրույցները, այդ թվում նաև Էրդողանի ընտանիքի անդամներինը:

Բացի այդ, գաղտնալսվել են թուրքական հետախուզության պետ Հաքան Ֆիդանի հեռախոսազրույցները, որից հետո Էրդողանը մեղադրեց դրանում Գյուլենին և նրա շարժման անդամներին: Էրդողանը նաև ասաց, որ Գյուլենի շարժումը իր հակապետական գործունեությամբ ապացուցեց, որ ոչ թե կրոնական շարժում է, այլ քաղաքականացված և ապօրինի կառույց: Էրդողանը կոչ արեց Գյուլենին չմիջամտել Թուրքիայի ներքին գործերին:

2013-ի դեկտեմբերին Թուրքիայում աղմկահարույց հակակոռուպցիոն գործողություն սկսվեց, որից հետո երկրում ձերբակալվում են ոստիկանության աշխատակիցներ ու ԶԼՄ-ների ներկայացուցիչներ: Համարվում է, որ ամենաազդեցիկ իմամներից մեկը ժամանակակից աշխարհում՝ Գյուլենն էր նախաձեռնել մեծ քաղաքական ու կոռուպցիոն սկանդալը, որը ցնցեց Թուրքիայի քաղաքական համակարգը «ընտրական» 2014 թվականին:

Եթե Գյուլենը հայրենիք վերադառնա, նա քրեական պատախասնատավության կենթարկվի ահաբեկչական կազմակերպության ստեղծման համար:

Գյուլենն ամենաազդեցիկ իմամներից մեկն է աշխարհում, որը հանդես է գալիս ԵՄ-ին Թուրքիայի անդամակցության օգտին և դեմ է երկրի միջամտությանը Սիրիայի պատերազմին: Նա հանդես է գալիս նաև քրիստոնյաների, մահմեդականների և հուդայականների միջկրոնական երկխոսության օգտին: Այդ հայացքները հակասում են Էրդողանի ծրագրերին, որը զգալիորեն սառել է ԵՄ հանդեպ, սատարում է Ասադի դեմ կռվող գրոհայիններին, արագ տեմպերով իսլամականացնում է Թուրքիան և սատարում պաղեստինցիներին:

Գյուլենի գլխավորած նուրսիստների շարժումը կրոնական կազմակերպություն է, որը մասնագետները համարում են «թուրքական կրոնական աղանդ», «ծայրահեղական կազմակերպություն», «պանթուրքիստական», ինչպես նաև «պանիսլամիստական» կամ «քրդական ծայրահեղական» կազմակերպություն: Կազմակերպությունը ստեղծվել է Թուրքիայում Առաջին համաշխարհային պատերազմից հետո ազգությամբ քուրդ, հայտնի աստվածաբան, Ղուրանի մեկնաբան, վահաբբիզմի հակառակորդ Սաիդ Նուրսիի կողմից: Այսօր նուրսիստների համայնքի համախառն կապիտալը հասնում է 80 մլրդ դոլարի:

http://www.panarmenian.net/arm/news/195038/