Դավութօղլուն չի բացառել քրդամետ կուսակցության հետ կոալիցիայի ստեղծումը

Թուրքիայի վարչապետ Ահմեթ Դավութօղլուն չի բացառել քրդամետ Ժողովուրդների դեմոկրատական կուսակցության՝ HDP-ի հետ կոալիցիա կազմելու հնարավորությունը։

Ինչպես տեղեկացնում է թուրքական TRT Haber կայքը, Թուրքիայի Ազգայնական շարժում կուսակցության հետ հանդիպումը հաջողությամբ չի ավարտվել, և ազգայնականները մերժել են կոալիցիա կազմել Դավութօղլուի գլխավորած Արդարություն և զարգացում կուսակցության հետ։

Դրանից հետո Դավութօղլուն հանդիպել է քրդամետ կուսակցության առաջնորդ Սելահեթթին Դեմիրթաշի հետ, ինչից հետո հայտարարել է, թե վերջինիս կեցվածքում փոփոխություն է նկատել։

Դավութօղլուն հանդիպել էր նաև Ժողովրդահանրապետական կուսակցության առաջնորդ Քեմալ Քըլըչդարօղլուի հետ։

Հիշեցնենք, որ հունիսի 7-ին կայացած խորհրդարանական ընտրություններին մասնակցել էր 20 կուսակցություն։ Խորհրդարանում ներկայացված լինելու իրավունք էին ստացել նրանցից 4-ը։ Արդարարություն և զարգացում կուսակցությունը չէր կարողացել կոալիցիա ձևավորել և այժմ բանակցում է կոալիցիոն կառավարություն ստեղծելու համար։

Քրդամետ կուսակցությունն առաջին անգամ է ներկայացված լինելու Թուրքիայի խորհրդարանում։ Այս ուժն ընտրությունների ընթացքում ստացել էր ձայների 13.1 տոկոսը։

http://www.tert.am/am/news/2015/07/15/davutoglu-demirtash/1733967