Թուրքիան նկարահանել է Հայոց ցեղասպանության մասին առաջին գեղարվեստական ֆիլմը

Թուրքական Today’s Zaman-ը հայտնում է, որ Թուրքիան առաջին անգամ Հայոց ցեղասպանության մասին գեղարվեստական ֆիլմ է նկարահանել: Աղբյուրը ցեղասպանությունը որակում է «հայերի աքսորը Անատոլիայից»:

«Կորուսյալ թռչունները» վերնագրով ֆիլմը թողարկվել է հունիսի 30-ին: Համացանցում հնարավոր է տեսնել ֆիլմի թրեյլերը` հղումով:

Ֆիլմի սյուժեն ծավալվում է մի քրոջ ու եղբոր շուրջ, ովքեր 1915-ից հետո մնում են նախնիների հողում. սա սիրո ու ընտանիքի պատմություն է:

Ֆիլմի սցենարի հեղինակը և համառեժիսորը հայազգի Արեն Պերդեջին է, մյուս համառեժիսորը՝ թուրք Ալէ Ալյամաջը: Գլխավոր դերակատարները ևս հայ ու թուրք են` ի դեմս Դիլա Ուլուջայի և Հերոս Ագոփյանի: Ֆիլմում հանդես են եկել Թուրքիայում բնակվող հայ դերասաններ:

Աղբյուրի բնորոշմամբ՝ «Կորուսյալ թռչունները» շրջադարձային աշխատանք է թուրքական կինոյի համար, քանի որ առաջին կինոաշխատանքն է ողբերգության մասին և նվիրված է Հայոց ցեղասպանության հարյուրամյա տարելիցին:

http://www.tert.am/am/news/2015/07/06/lost-birds-released/1726958