Թուրքիայի հայկական «Ակօս» թերթը հրատարակել է իր 1000-րդ համարը

Լույս է տեսել Թուրքիայում hայերեն և թուրքերեն հրատարակվող հայկական «Ակoս» թերթի հոբելյանական` հազարերորդ համարը: 1996թ. ապրիլի 5-ին ընդամենը 4 հոգուց բաղկացած (Հրանտ Դինք՝ թերթի հիմնադիր-խմբագրապետ, Լուիս Բաքար, Հարություն Շեշեթյան, Աննա Թուրայ) նախաձեռնող խմբով իր գործունեությունը սկսած թերթը կարողացել է թուրքական մամուլի պատմության մեջ աննախադեպ հաջողությունների հասնել:
Թուրքական «Bianet» պարբերականին հարցազրույց տված «Ակօս»-ի գլխավոր խմբագիր Էդվարդ Տանձիկյանը նշել է, որ Թուրքիայի հայկական համայնքի համար մեծ կարևորություն ունի արդեն 1000 համար թողարկած թերթ ունենալը, գրում է Ermenihaber.am-ը:
«Երբ հարյուր տարի հետ եմ նայում, տեսնում եմ` չկա այնպիսի թերթ, որը կարողացած լինի 1000 համար թողարկել: Նախկինում 2 միլիոնանոց հասարակություն ունեինք, իսկ հիմա ընդամենը 60 հազարանոց մի համայնք կա, ու նա կարողանում է դա անել: Այդ պատճառով հայ համայնքի համար շատ կարևոր է սեփական ուժերով թերթի 1000-րդ համարի հրատարակումը»,- ասել է Տանձիկյանը:
Թերթի ներկայիս խմբագիրը նշել է, որ այս հաջողությունը գրանցվել է Հրանտ Դինքի, թերթի անմիջական աշխատակիցների ու նաև՝ թերթի գործունեության մեջ իրենց ներդրումն ունեցած բազմաթիվ մարդկանց շնորհիվ:
Խմբագիրը նաև ընդգծել է, որ «Ակօսը» մեծ կարևորություն ունի թուրքական մամուլի և հենց Թուրքիայի պատմության մեջ:
«Ակօս»-ը ավելի բաց դարձրեց Թուրքիան: Հրանտ Դինքի՝ խմբագիր եղած ժամանակ «Ակօս»-ը գրում էր այնպիսի թեմաների մասին, որոնց մասին բոլորը միայն շշուկով էին խոսում, բայց երբեք չէին համարձակվում բարձրաձայնել: Դրա համար նա նաև շատ թանկ վճարեց: Բայց դրա շնորհիվ «Ակօս»-ն առանձնահատուկ տեղ զբաղեցրեց Թուրքիայի պատմության մեջ՝ աննախադեպ ներդրում ունենալով կարգավորման գործընթացում»:
Ռուբեն Մաշոյանի կողմից «Ակօս» անվանակոչված թերթի առաջին խմբագիրը եղել է 2007թ. սպանված Հրանտ Դինքը, նրան այս պաշտոնում հաջորդել են Էթյեն Մահչուփյանը, Ռոբեր Քոփթաշը և Էդվարդ Տանձիկյանը: Իր հազարերորդ համարում թերթն անդրադարձել է «Ակօս»-ի և Թուրքիայի պատմության մեջ իրենց ուրույն հետքը թողած մի շարք թեմաների:
Hayernaysor.am