Թուրքիայից Քոբանի ներխուժած իսլամիստները հային սպանել են որդու աչքի առջեւ

Վերջին ամիսներին իսլամիստներից ազատագրված Սիրիայի Քոբանի քաղաք վերադարձած խաղաղ բնակչության մեջ են եղել ազգությամբ հայ Հովսեփ Թոմասյանն ու որդին, սակայն Թուրքիայի տարածքից Քոբանի ներխուժած իսլամիստները երեխայի աչքի առաջ սպանել են հորը։

Թուրքական Radikal-ի թղթակիցը զրուցել է Սիրիայի հետ սահմանակից Թուրքիայի փախստականների ճամբարում գտնվող եւ իսլամիստների հարձակման ժամանակ Քոբանիից հեռացած Հակոբ Թոմասյանի հետ։

Հակոբ Թոմասյանը պատմել է, որ «Իսլամական պետության» ահաբեկիչների հարձակման հետեւանքով իրենք 9 ամիս առաջ մյուս բնակիչների հետ լքել են Քոբանին։

«Սակայն Քոբանին ազատագրելուց ամիսներ անց որոշեցինք վերադառալ Քոբանի։ Իսլամիստների վերջին հարձակումից առաջ եղբայրս որոշեց գնալ տան ու խանութի վիճակը տեսնել։ Խանութի մոտ իսլամիստները եղբորս սպանել են որդու աչքի առջեւ»,-ասել է Հակոբ Թոմասյանը։

Հոր սպանության ականատես Արամը պատմել է, որ հայրն ասել էր, որ գնում է` խանութի վիճակը նայի։ Շատ չանցած ես էլ որոշեցի գնալ խանութ։ Երբ հասա խանութի մոտ, 4 հոգի զինված կանգնած էին հորս դիմաց։ Նրանցից մեկը զենքը պահեց հորս ուղղությամբ եւ կրակեց։ Հայրս ընկավ, արյունը հոսում էր նրա սրտից։ Չնայած այդ վիճակին` հայրս բղավեց. «Որդիս, փախիր, սրանք իսլամիստներն են։ Եթե ես չփախնեի, ես էլ կսպանվեի։ Հայրս թաղվել է Քոբանիում»,-ասել է Արամը։

Նշենք, որ հունիսի 25-ին «Իսլամական պետություն» ահաբեկչական խմբավորման մոտ 100 զինյալներ փոքր ջոկատներով մտել են Քոբանի եւ միավորվելով սկսել են խաղաղ բնակչության կոտորած իրականացնել։

Ականատեսների վկայությամբ՝ իսլամիստների որոշ խմբեր Քոբանի են մտել Թուրքիայից։

http://news.am/arm/news/274856.html