Թուրքիայում հետապնդվում են կառավարությունում տիրող կոռուպցիոն դեպքերը բացահայտող լրագրողները

«Ազատություն լրագրողներին» (GÖP) հարթակի նիստի ժամանակ թուրքական մամուլի հետ կապված միությունները քննադատության են ենթարկել կառավարության կողմից անկախ ԶԼՄ-ներին ճնշելը՝ Անկարային մեղադրելով լրագրողներին հետապնդելու համար, երբ վերջիններս բացահայտում են իշխանության բարձրագույն էշելոններում գոյություն ունեցող կոռուպցիոն դեպքերը, գրում է Mk-turkey.ru-ն։
«Այսօր մեր կառավարությունը փորձում է խանգարել լրագրողներին կատարել իրենց աշխատանքը։ Արդյունքում՝ մեզանից շատերը կորցնում են իրենց աշխատատեղը, իսկ ոմանց նույնիսկ ազատազրկում է սպառնում»,- հայտարարել է Մամուլի խորհրդի նախագահ Փինար Թուրենչը։
Նրա խոսքով՝ իրենց երկիրն ապրում է անպատժելիության շրջան, քանի որ Թուրքիայում իսպառ բացակայում է դատական համակարգի անկախությունը։ Լրագրողներին պարզապես տանում են անհայտ ուղղությամբ։
Թուրենչը հիշեցրել է նաև լրագրող Մեհմեթ Բարանսուի և STV-ի գլխավոր տնօրեն Հիդայեթ Քարաջայի մասին, ովքեր այժմ գտնվում են կալանքի տակ՝ չափազանց կասկածելի մեղադրանքներով։
Թուրքիայի ժամանակակից լրագրողների միության նախագահ Ահմեդ Աբաքայը նշել է, որ ամենամեծ խնդիրը, որին բախվում են լրագրողները Թուրքիայում, քաղաքական բնույթ ունի։ «Լրագրողները մնացել են մենակ կառավարության հետ, որը նրանց մեջ թշնամիներ է տեսնում»,- հայտարարել է նա։

http://www.tert.am/am/news/2015/07/01/turkey/1722668