Թաքնուած հայերը եւ թուրքին անթաքոյց սարսափը

Միհրան Քիւրտօղլեան

Թուրքիոյ վերջին ընտրութեանց արդիւնքով իրարու հակադիր երեք կուսակցութեանց ցանկերուն մէջ ներառնուած երեք հայ թեկնածուներու ընտրութիւնը (պատուաբեր քուէներով) եւ ընդհանրապէս երկրին քաղաքական նոր խմորումները կը շարունակեն վերլուծման թեմա մնալ հայ թէ միջազգային յօդուածագրութեանց մէջ : Չտարածուելու համար , այդ վերլուծումներէն միայն մէկ կէտին վրայ կ’արժէ պահ մը կենալ ու խորհրդածել :

23 Յունիսին Ազդակ օրաթերթին մէջ թուրք յայտնի լրագրողի մը մէկ վերլուծումէն մէջբերում մը կար , ուր ան առանց բառերը ծամծմելու կը յայտնէ , թէ Թուրքիոյ խորհրդարանական ընտրութիւններուն յաղթեցին ծպտեալ հայերը : Աւելին. ակնարկելով քիւրտամէտ նոր կուսակցութեան , (որ 10 առ հարիւրի սահմանը հատելով դարձած է խորհրդարանական խմբակցութիւն եւ այդ պատճառով ալ ՝ Թուրքիոյ կառավարման համակարգը նախագահական վարչակարգի վերածելու Էրտողանի փայփայած ծրագիրը գէթ առայժմ ձախողութեան մատնած) , անսեթեւեթ կը գրէ . «…Անձնապէս պիտի յօժարիմ նոյնիսկ , որ անոնք քիւրտական կուսակցութիւն մը ըլլան : Կը բաւէ , որ հայկական կուսակցութիւն մը չըլլան…» :

Մտածենք պահ մը , որ տասնամեակներէ ի վեր , իսկ վերջին շրջանին շեշտուած կերպով հակառակ անոր որ Թուրքիոյ մեծագոյն գլխացաւանքը քիւրտերն են , բայց տակաւին … լրագրողը կը նախընտրէ քիւրտականը , «կը բաւէ , որ հայկական կուսակցութիւն չըլլան» : Անշուշտ կայ նաեւ հաւանականութիւնը , որ քիւրտերը եթէ զրկուին խորհրդարանին մէջ ներկայ ըլլալու իրաւունքէն , անոնք իրենց գոյութիւնը պիտի զգացնեն լեռներու վրայ ՝ զէնն ի ձեռին :

Ամենայնդէպս , առանց փաստի ու տուեալի , միայն ենթադրաբար կարելի է եզրակացնել , որ ,

1. Թուրք վերնախաւը լաւ գիտէ իսլամացած-իսլամացուած կամ քիւրտացած թէ թրքացուած հայերու թուաքանակին ազդեցիկ տարողութիւնը : Քուէ որսալու հաշիւով է , որ կը բացատրուի , թէ ինչու ճակատագրական համարուող վերջին ընտրութիւններուն ՝ հայ թեկնածուներ ներգրաւուած էին տարբեր կուսակցութեանց ընտրացանկերուն մէջ :

2. Պէտք չէ կասկածիլ , որ թաքնուած հայերու քուէները կեդրոնացած ըլլան հայ թեկնածուներուն վրայ : Թուրքիոյ վերնախաւին համար հաւանական յայտնութիւնը , վստահաբար նաեւ մտահոգիչը եղաւ այն , որ այդ հայերը թերեւս առաջին անգամն ըլլալով եւ ներքին անբացատրելի մղումով «հաւաքաբար» իրենց «ինքնութիւնը» պոռթկացին քուէներու ընդմէջէն :

3. Անոնց հաւաքական յիշողութեան վերականգնումին մէջ անպայման ներազդած պիտի ըլլան հայոց ցեղասպանութեան 100-ամեակի համահայկական շարժումին արձագանգները :

4. Հինէն , թուրքիոյ խորքային պետութեան վերնախաւին , այսինքն երկրին իսկական ղեկին գտնուող բարձրաստիճան բանակայիններու ակումբին մղձաւանջը եղած են թաքնուած հայերը : Թուրքիոյ տարածքին , որեւէ տեղ ու որեւէ պատճառով տագնա՞պ կայ , համալսարաններու փտածութեան դէմ ուսանողական ըմբոստութիւ՞ն կայ , աշխատաւորական ցոյցեր ու խառնակութի՞ւն , ապա ուրեմն այդ շարժումները ուղղորդող ղեկավար տարրը կասկածի տակ կը դրուի իբրեւ թաքուն հայ , որ Թուրքիոյ շահերուն վնաս պատճառելով վրէժ կը լուծէ : Զգո՜յշ , շատ զգոյշ , որպէսզի թաքնուած հայեր չթափանցեն պետական համակարգի մէջ , կարեւոր ու բանալի պաշտօններու չտիրանան : Իբրեւ թաքնուած հայ կասկածի տակ են բոլորը , որոնք բացայայտ կամ ակամայ վնաս կը պատճառեն Թուրքիոյ : Ահա թէ ինչու Օչալան նկատուեցաւ քիւրտացած մը , որ սակայն ծագումով ու ինքնութեամբ հայ է (թաքնուած) : Այդ կասկածէն զերծ չմնաց նոյնիսկ նախագահական պաշտօնին վրայ գտնուող նոյնինքն Ապտալլա Կիւլ , ՀՀի նախագահին հետ իր ունեցած ֆութպոլային քաղաքականութեան պատճառով : Կիւլ դատախազութեան դիմեց ամբաստանողին դէմ , ծագումով հայ մեծ մայր ունեցած ըլլալու արձակուած ցեխը մաքրելու համար : («Ժողովրդավար» Թուրքիոյ մէջ ծագումով հայ մեծ մայր ունենալը արատաւոր ըլլալ կը նշանակէ տակաւին) :

«Կը բաւէ , որ (քիւրտականի անուան տակ) հայկական (թաքնուած հայերու) կուսակցութիւն մը չըլլան»…կը գրէ թուրք լրագրողը իր վերլուծումին մէջ :

Թաքնուած հայերու ուրուականին հալածախտէն տառապող թուրքին սարսափն է , որ անթաքոյց կը յայտնուի թուրք լրագրողին գրիչով :

http://www.horizonweekly.ca/news/details/69228