Սուրբ Կիրակոսը թող օրինակ դառնա մյուսների համար. Թուրքիայում հերթական եկեղեցիներն են ավերման եզրին հայտնվել

Թուրքիայի Դիարբեքիրի Սուրբ Կիրակոս հայկական եկեղեցին մրցանակների է արժանանում, սակայն Սասունի Գոմք վանքն ու Բինգյոլի Սուրբ Աստվածածին եկեղեցին ոչնչացման վտանգի տակ են։

«Հուսով ենք, որ Սուրբ Կիրակոսը երկրի չորս կողմերում առկա պատմական հայկական ժառանգության վերակենդանացման համար օրինակ կհանդիսանա»,- գրում է «Ակօս»-ը:

Դիարբեքիրում վերակառուցված Սուրբ Կիրակոսը Եվրամիության կողմից Եվրոպայի մշակութային ժառանգության մրցանակին էր արժանացել: 29 երկրների 263 կոթողների թվում ընտրված 28 կառույցներից մեկը նույն մրցույթին նաև երկու այլ մրցանակ էր ստացել:

Անատոլիայի (Արևմտյան Հայաստանի-Ակունքի խմբ.) հայկական մշակութային ժառանգությունը, սակայն, անխնամ մնալու և կողոպտվելու պատճառով վերանալու վտանգի տակ է:

Այդ առումով մեծ աշխատանք է իրականացնում Սասունի, Բիթլիսի, Բաթմանի, Մուշի, Վանի, Ստամբուլի և բոլոր նահանգների հայկական գյուղերի միությունը: Կառույցի նախագահ Ազիզ Դաղջըն ասում է, որ Մուշի Սուրբ Կարապետ վանքի ու Անիի ավերակների հարցում իրենց միջամտությունը դրական արդյունք է տվել:

Փոխարենը՝ Սասունի Գոմքի շրջանի վանքը փլուզման եզրին է: Նույն ճակատագիրն է կիսում նաև Բինգյոլի Սուրբ Աստվածածինը:

Մուշի Սուրբ Կարապետի վերակառուցման աշխատանքները նոր թափ են ստացել:

Վերակառուցման աշխատանքներ են սկսվել նաև 1600-ամյա պատմություն ունեցող պատմական հայկական Անի քաղաքում:

Բաթմանի Սասուն շրջանում կառուցված մոտ 1500-ամյա վանքի վիճակը, սակայն, անմխիթար է: Չնայած այստեղ վերակառուցման աշխատանքները մեկնարկել են իբր մայիսից, սակայն պատմական այս եկեղեցին դեռ շարունակում է որպես ախոռ օգտագործվել: 1915-ից առաջ 20 տնից բաղկացած հայկական գյուղի մոտակայքում գտնված եկեղեցում այսօր խոշոր և մանր եղջերավոր կենդանիներ են պատսպարվում, այն գանձ որոնողների կողմից էական վնաս է կրել։

http://www.tert.am/am/news/2015/06/18/turkey/1710689