Հայոց ցեղասպանությունը հիշատակած թուրք ուսանողների դեմ հետաքննություն է սկսվել

Հայոց ցեղասպանության 100-րդ տարելիցին հիշաակի միջոցառում անցկացրած Ստամբուլի Տեխնիկական համալսարանի ուսանողների դեմ համալսարանի ղեկավարությունը հետաքննություն է սկսել։

Ինչպես տեղեկացնում է Ստամբուլի հայկական «Ակօս»-ը, ապրիլի 24-ին Հայոց ցեղասպանության զոհերի հիշատակին սգո միջոցառում կազմակերպած ուսանողների դեմ կարգապահական հետաքննություն է սկսվել, որի հետ կապված հայտարարություն է տարածել պրոռեկտոր Ալի Ֆուաթ Այդընը։

Հայտարարության մեջ ասվել է, թե 40 հոգանոց ուսանողների մի խումբ Հայոց ցեղասպանության հիշատակման համար անօրինական պաստառ է փակցրել, ինչը հակասում է համալսարանի կանոնադրությանը։

Համալսարանի ուսանողները հայտնել են, որ համալսարանի ղեկավարությունը ճնշման տակ է պահում ընդդիմադիր հայացքներ ունեցող ուսանողներին։

Նշենք, որ ապրիլի 24-ին համալսարանի տարածքում ուսանողները Հայոց ցեղասպանության զոհերի հիշատակման միջոցառում են կազմակերպել՝ պարզելով Հրանտ Դինի, Սեւակ Շահին Բալըքչըի եւ 1915-ի ապրիլի 24-ին ձերբակալված ու մահվան ուղարկված հայ մտավորականների լուսանկարները, ինչպես նաեւ բացականչել՝ «Առերեսվ’եք Հրանտի հետ, ցեղասպանության հետ»։

Համալսարանի անվտանգության աշխատակիցներն ու ոստիկանները փորձել են ուսանողներից խլել պաստառները, որի ժամանակ որոշ ոստիկաններ ուժ են կիրառել ուսանողների դեմ։

http://news.am/arm/news/272275.html