Թուրք գրող. Թուրքիայի մտավորականությունը թյուր կարծիք ունի Ցեղասպանության մասին

«Հայ հեղափոխական Փարամազը. հայ սոցիալիստները և Ցեղասպանությունը Աբդուլ Համիդից մինչև Իթթիհատ» գրքի հեղինակ, թուրք գրող-հրապարակախոս Քադիր Աքընն այսօր լրագրողների հետ զրույցում տեղեկացրել է, որ գրքի վրա սկսել է աշխատել երկու տարի առաջ, իսկ գրքի շնորհանդեսը տեղի է ունեցել ապրիլի ամսին` Ստամբուլում և Անկարայում, գրում է Henaran.am-ը:

«Կան առաջարկներ, որ գիրքը թարգմանենք հայերեն, գերմաներեն, 2600 օրինակ էր տպագրվել, և այն սպառվել է, այսօր արդեն պատրաստվում ենք երկրորդ անգամ գիրքը հրատարակել»,-ասել է Քադիր Աքընը:

Նրա խոսքով գրքի հրապարակելուց հետո մինչ օրս իր նկատմամբ ճնշումներ չեն գործադրվել: Այս գրքով հրապարակախոսը ցանկացել է ասել, որ Հայոց ցեղասպանությունը ոչ միայն 1.5 միլիոն հայի կոտորած էր, այլև այդ տարածաշրջանում մշակույթի կոտորած է տեղի ունեցել, և միևնույն ժամանակ արմատախիլ են արվել սոցիալիստական գաղափարները Թուրքիայում: Խոսելով Թուրքիայում գրքի կարևորության մասին` հրապարակախոսը ասել է. «Թուրքիայի մտավորականությունը թյուր կարծիք ունի Ցեղասպանության մասին, նրանք սխալ են ընկալում, այս գիրքը կնպաստի, որ նրանք ճիշտ տեղեկություններ ունենան Ցեղասպանության մասին և սկսեն քարոզել, որպեսզի Թուրքիայում ընդունեն Ցեղասպանությունը»:

Քադիր Արքընի կարծիքով` Հայոց ցեղասպանության մասին 100 տարի շարունակ Թուրքիայում լայն զանգվածները ստերով են սնվել, և այժմ եկել է ժամանակը առերեսվելու և խոսելու Ցեղասպանության մասին:

«Լայն զանգվածներ սկսել են ճանաչել Ցեղասպանությունը և տարածել, որ ցեղասապնություն է եղել: Պետությունը կճանաչի այն դեպքում, երբ հասարակ ժողովուրդը և մտավորականությունը հասնի այդ կետին և ներքևից ճնշում գործադրի պետության վրա»,-ասել է Քադիր Աքընը:

Սոցիալ-դեմոկրատ Հնչակյան կուսակցության ներկայացուցիչ դոկտոր Եղիա Ջերեջյանն էլ տեղեկացրել է, որ ինքն ընդառաջել է գրող-հրապարակախոսին և նրան նյութեր տրամադրել. «Ընդառաջեցի նրան, և Լիբանանում գտնվող արխիվից օգտվեց, Հնչակյան կուսակցության և այդ ժամանակաշրջանի մասին բազմաթիվ տեղեկություններ հավաքագրեց և գրեց այս գիրքը: Այստեղ ամենակարևորն այն է, որ Քադիր Աքընը Ցեղասպանությունն իրականություն է համարում, և նրա համար տեղի ունեցածը ճշմարտություն է»:
Ջերեջյանը նշել է, որ Թուրքիայում հայամետ գրողներին Հայաստանում պետք է օժանդակեն և պետք է նրանց բերեն Հայաստան, ծանոթացնեն հայկական մշակույթին և պատմությանը. «Պետք է նրանց քաջալերենք և թիկունք կանգնենք: Նրանք պետք է զգան, որ Հայաստանում նրանց աշխատանքը գնահատվում է»:

http://armeniangenocide100.org/author-turkish-intellectuals-have-wrong-opinion-on-armenian-genocide/