Գյուլը մեկնել էր Հայաստան՝ չնայած Էրդողանն ու ԱԳՆ-ն դեմ էին. Գյուլի խորհրդական

12 տարի Թուրքիայի նախկին նախագահ Աբդուլլահ Գյուլի խորհրդականի պաշտոնում աշխատած Ահմեթ Սևերն իր «12 տարի Աբդուլլահ Գյուլի հետ» գրքում անդրադարձել է նաև 2008 թ. Գյուլի՝ Հայաստան կատարած այցին ու «ֆուտբոլային դիվանագիտությանը», տեղեկացնում է «Ակօսը»։

2008 թ. Թուրքիայի նախագահ Աբդուլլահ Գյուլը ՀՀ Նախագահ Սերժ Սարգսյանի հրավերով այցելել էր Երևան՝ դիտելու Հայաստան-Թուրքիա ֆուտբոլային հանդիպումը։

Սևերը նշում է, որ այդ այցին Թուրքիայի իշխող վերնախավում բոլորը, այդ թվում՝ այն ժամանակվա վարչապետ Ռեջեփ Թայիփ Էրդողանը դեմ են եղել։ «Հայաստան մեկնելդ նա էլ չի ուզում»,-ասել է Էրդողանը՝ մատնացույց անելով այդ ժամանակ ԶՈՒ գլխավոր շտաբի պետ Իլքեր Բաշբուղին։

«Սակայն նա գնաց՝ չնայած որ մենակ էր մնացել։ Այդ գործընթացը բացեց դեպի Արձանագրությունները տանող ճանապարհը»,-ասել է Սևերը։

Նախկին խորհրդականն անդրադարձել է նաև Հայաստան մեկնելու Գյուլի որոշման պատճառներին։

«Քրդական, Հայկական ու Կիպրոսի հարցերը կարևոր էր համարում։ Մտածում էր, որ այդ հարցերը գնալով ավելի են փտախտի վերածվում։ Մտածում էր, որ «ֆուտբոլային դիվանագիտության» շրջանակներում Հայաստան մեկնելը կբացի կարգավորման ճանապարհը։ Նրա մեկնելը չէր ուզում նաև արտգործնախարարությունը։ Մտածում էր, որ անվտանգությանը, ինչպես նաև Ադրբեջանի հետ հարաբերություններին վնաս կհասցնի։ «Ես մեկնելու եմ»,-ասաց»,-պատմել է Սևերը։

http://www.tert.am/am/news/2015/06/16/gul-armenia/1708474