Թուրքիայում քննարկում են Գյուլի վերադարձը

«Նախկին նախագահ Գյուլի` ԱԶԿ վերադարձի շուրջ քննարկումները թեժանում են». այս վերնագրով հոդված է հրապարակել թուրքական Today’s Zaman թերթը՝ Թուրքիայում հունիսի 7-ի խորհրդարանական ընտրություններից հետո ստեղծված վիճակի մասին: Հոդվածի հեղինակ Գյուլթեն Ուսթունթաղը գրում է, որ ընտրություններից հետո իշխանամետ գործիչները սկսել են քննարկել նախկին նախագահ (2007-2014 թթ.), Արդարություն և զարգացում (ԱԶԿ) կուսակցության համահիմնադիր Աբդուլլահ Գյուլի վերադարձը քաղաքականություն՝ փոխարինելու վարչապետ Ահմեդ Դավութօղլուին: Հոդվածը թարգմանաբար ներկայացված է ստորև:
Ի լրումն իշխանամետ լրատվամիջոցներում քննարկումների, այս հարցը դարձել է հարցումների առարկա: Ըստ Andy-AR հարցումներ իրականացնող իշխանամետ ընկերության, ԱԶԿ կողմնակիցների շրջանում Գյուլին աջակցողների թիվը կազմում է 76 տոկոս:
Գյուլի շուրջ քննարկումները բուռն ընթացք ստացան արտահերթ ընտրությունների վերաբերյալ շահարկումներից հետո՝ հաշվի առնելով, որ ոչ մի կուսակցություն ձեռք չբերեց միակուսակցական կառավարություն կազմավորելու համար անհրաժեշտ մեծամասնությունը, իսկ կոալիցիա կազմելու հնարավորությունները խոստումնալից չեն՝ գաղափարական խոր տարբերությունների պատճառով:
Andy-AR ընկերությունը հայտնի է իր հարցումների հակասական արդյունքներով, որոնք ավելի շատ ընտրական աջակցություն էին ցույց տալիս ԱԶԿ կուսակցությանը, քան այն ստացավ հունիսի 7-ին, իսկ քրդամետ Ժողովուրդների դեմոկրատական կուսակցության (ԺԴԿ) համար կանխատեսում էր, որ չի հաղթահարի խորհրդարան մտնելու 10 տոկոսի շեմը: Սակայն ԺԴԿ-ն հավաքեց 13 տոկոս: Andy-AR-ի վերջին հետազոտությունը բացահայտում է, որ ԱԶԿ-ի վայրընթաց միտումը կարող է փոխվել, եթե Գյուլը ստանձնի վերջինիս առաջնորդությունը, և որ այդ աջակցությունը կարող է ավելի քան 45%-ով ավելանալ:
Ֆեհմի Կորուն՝ «Հաբերթուրք» օրաթերթի իշխանամետ սյունակագիրներից մեկը, բարձրացրել է Ահմեդ Դավութօղլուի` պաշտոնում մնալու նպատակահարմարության հարցը: Նա իր սյունակում գրել է. «ԱԶԿ-ի համագումարը, որը նախատեսվում է անցկացնել սեպտեմբերին, ավելի շուտ կլինի, և կընտրվի կուսակցություն նախագահ, ով հստակություն կմտցնի ներկայում ԱԶԿ-ի առջև ծառացած երկընտրանքների հարցում: Եթե Դավութօղլուն վերընտրվի, նրա ղեկավարության նկատմամբ առարկությունները կնվազեն, սակայն եթե մեկ ուրիշն ընտրվի կուսակցության նախագահի պաշտոնում, ապա կոալիցիոն կառավարության շուրջ սակարկությունները սահուն կերպով նոր ընթացք կստանան»:
Կորուն այունհետև ավելի արմատական առաջարկ է անում և խնդրում նախագահ Ռեջեփ Թայիփ Էրդողանին թողնել իր շքեղ ու հակասական նախագահական պալատը, որը ստացել է «Ակ Սարայ» անվանումը, և որը կառուցվել է՝ չնայած այն հանգամանքին, որ մի քանի դատարան դրա կառուցումն ապօրինի էր համարել: «Քանի որ թուրքական ոճի նախագահական համակարգ ստեղծելու ծրագրերը հանրության կողմից աջակցություն չստացան, ինչպես ցույց տվեցին ընտրությունների արդյունքները, ապա նախագահի պալատը կարող է հատկացվել վարչապետին, իսկ նախագահը կարող է տեղափոխվել Չանքայա պալատ՝ նախկին նախագահական գրասենյակ»:
Կորուի մեկնաբանություններին արձագանքեցին իշխանամետ բուռն ձայներ՝ ի դեմս «Ենի Շաֆակ» օրաթերթի սյունակագիր Ահմեդ Թաշգեթիրենի, որը Կորուին մեղադրեց «Գյուլին պատերազմի մեջ ներքաշելու համար» և հարցադրում անելով, թե արդյոք Գյուլը տեղյակ է եղել այդ հոդվածի մասին` նախքան Կորուի գրելը:
Ահմեդ Թաքանը՝ Գյուլի վարչապետության օրոք նրա գլխավոր քաղաքական խորհրդականներից մեկը, հինգշաբթի «Զաման» թերթին ասել է, թե վստահ է` Դավութօղլուն ստիպված կլինի հեռանալ վարչապետի պաշտոնից: «Սակայն Էրդողանն ամեն ինչ կանի՝ կանխելու Գյուլի կողմից ԱԶԿ-ի վերահսկողության ստանձնումը: Բայց Գյուլը նաև խուսափում է Էրդողանի հետ հրապարակային պայքարից: Նա նախընտրում է համախմբել կուսակցության ներսում և դրանից դուրս երկրորդական տարրերը, ինչպես նաև միջազգային կազմակերպությունների աջակցությունը` կուսակցության ղեկավարումն ապահովելու համար: Նա սպասում է: Նա մի ծրագիր է կազմում` վարագույրի հետևից դուրս գալու համար: Նա փորձում է ցույց տալ, որ ԱԶԿ-ն իր առաջնորդության խիստ կարիքն ունի»:
Թաքանը հավելել է. «ԱԶԿ-ն արդեն կտորների է վերածվել [ընտրությունների արդյունքում]: Նրա ապագան պարզ կդառնա հաջորդող օրերին: Կարող են լինել հրաժարականներ, ինչպես նաև նոր քաղաքական կուսակցություն ձևավորելու պահանջներ՝ վիրավորված պատգամավորների քաղաքական գործիչների կողմից սկսված շարժում: Մի խոսքով, Գյուլը երբեք քաղաքական խաղից դուրս չի եղել, և առաջնորդության համար պայքարը նոր թափ է առնում ԱԶԿ-ում: Սակայն, եթե նույնիսկ Գյուլը հասնի էլ իր նպատակին և գահընկեց անի Դավութօղլուին, նրա ղեկավարությունը բավարար չի լինի կանխելու ԱԶԿ-ի փլուզումը»:
Մեկ այլ գաղտնի պատերազմ Էրդողանի և Դավութօղլուի միջև
Հունիսի 7-ի խորհրդարանական ընտրություններից հետո Էրդողանի և Դավութօղլուի միջև պայքարն ավելի խորանալով՝ տեղափոխվել է մեկ այլ հարթություն. երկուսի աջակիցներն էլ սկսել են միմյանց քննադատել վարագույրի հետևում: ԵՄ հարցերով նախկին նախարար Էգեմեն Բաղըշը, որը 2013թ. դեկտեմբերի 17-ի. կոռուպցիոն հետաքննության հիմնական կասկածյալներից էր և ներկայում Էրդողանի գլխավոր խորհրդականներից է, վերջերս մի հանդիպման ժամանակ խիստ քննադատության է ենթարկել Դավութօղլուին:
Բաղըշը մեղադրել է Դավութօղլուին ԱԶԿ-ի` ընտրություններում ձախողման մեջ՝ ասելով, որ «ղեկավարը [Էրդողանը] մեծ սխալ արեց` Դավութօղլուին վստահելով կուսակցության ղեկը»:

http://civilnet.am/2015/06/12/national_debate-heats-up-over-return-of-former-president-gul-to-ak-party/#.VXveF1If6qw