Ցեղասպանությունը ճանաչած երկրներից հետ կանչված թուրք դեսպանները չեն վերադառնա. Թուրքիայի ԱԳՆ

Թուրքիայի արտգործնախարարի խոսնակ Թանժու Բիլգիչը հայտնել է, որ Հայոց ցեղասպանությունը ճանաչող երկրներից հետ կանչված դեսպանները չեն վերադառնալու, տեղեկացնում է Haber7 կայքը։

Հարցին, թե Ցեղասպանության հարցում Թուրքիայի դիրքորոշումը որևէ կերպ փոփոխվե՞լ է, և ե՞րբ են դեսպանները վերադառնալու պաշտոնավարման երկրներ, Բիլգիչը հայտնել է, որ որևէ փոփոխություն չկա։
«Այսպես կոչված՝ Հայոց ցեղասպանության պնդումների վերաբերյալ մեր քաղաքականության մեջ որևէ փոփոխություն չի եղել։ Այդ հարցի առնչությամբ այլ երկրների դեմ ինչ-որ իրականացրել էինք, նույնն արել ենք Բրազիլիայի նկատմամբ։ Այդ արտահայտությունն առաջին անգամ օգտագործող երկրների դեսպաններին հետ էինք կանչել՝ խորհրդակցությունների համար։ Այդ դեսպանները մոտ ապագայում չեն վերադառնա»,-ասել է նա։

Թուրքիայի ԱԳՆ-ն օրերս տեղեկություն էր տարածել, որի համաձայն` Բրազիլիայում Թուրքիայի դեսպան Հուսեյն Դիրիյոզը հետ է կանչվել Անկարա` խորհրդակցությունների:

Հայտարարության մեջ նշվում էր, որ Թուրքիան դատապարտում է Բրազիլիայի սենատի կողմից հունիսի 2-ին Հայոց ցեղասպանության առնչությամբ բանաձևի ընդունումը:
http://www.tert.am/am/news/2015/06/12/genocide-mfa-turkey/1704930