Ստամբուլահայ կին պատգամավորը հայտնել է, թե ինչ օրինագիծ է ցանկանում մշակել

Թուրքիայի խորհրդարանական ընտրությունների արդյունքում Ժողովրդահանրապետական (CHP) կուսակցության կողմից պատգամավոր դարձած հայուհի Սելինա Օզուզուն Դողանը հարցազրույց է տվել Ստամբուլի հայկական «Ակօս»-ին։
Սելինա Դողանը, անդրադառնալով ընտրությունների արդյունքին, նշել է, թե ինքը միշտ շեշտել է, որ արդեն անցել է Արդարություն եւ զարգացում կուսակցության դարաշրջանը, եւ դրա ամենալավ պատասխանը տվեցին քվեատուփերը։ Նա շեշետել է, թե ներկա պահին ամենակարեւոր քաղաքական դերակատարումն ունի CHP-ն՝ հիշեցնելով, որ կուսակցության ղեկավարությունը գոհ է արդյունքներից։
Հայ կին պատգամավորը նշել է, թե ցանկանում է աշխատել ատելության սերմանման եւ խտրականության դեմ պայքարի օրինագծի վրա՝ ընդգծելով, որ կուսակցության որոշմամբ էլ կկատարի տարբեր պարտականություններ։ «Սակայն Արդարադատության, Սահմանադրության եւ Մարդու իրավունքների հանձնաժողովներում եմ ուզում ընդգրկվել» ամփոփել է Սելինա Դողանը։
Նշենք, որ հայուհին ծնվել է 1977-ին, Ստամբուլում: Ամուսնացած է, ունի երկու երեխա: Աշխատում է փաստաբանական գրասենյակում: Հայերենից եւ թուրքերենից բացի` տիրապետում է նաեւ անգլերենին եւ ֆրանսերենին:
http://news.am/arm/news/271354.html