Թուրքիայում կայացած ընտրությունների պատճառով ձգձգվում է հայկական որբանոցի վերադարձնելու գործընթացը

Ստամբուլի «Արմեն» որբանոց-ճամբարի՝ հայ համայնքին անցնելու գործընթացը տեղից չի շարժվել: Ինչպես տեղեկացնում է «Ակօս»-ը, պետական պատկան մարմինները այդ ուղղությամբ դեռ որևէ քայլ չեն ձեռնարկել:

Որբանոցի ներկայիս սեփականատեր Ֆաթիհ Ուլուսոյը հայտնել էր, որ մտադիր է այն նվիրաբերել հայ համայնքին, սակայն սեփականության վկայականի հանձնման գործընթացը չի կայացել նաև այս շաբաթ:

Արդարություն և զարգացում կուսակցության մերձավոր շրջանակները տեղեկացնում են, որ գործընթացի ձգձգումը պայմանավորված է Թուրքիայում կայացած խորհրդարանական ընտրություններից հետո ստեղծված իրավիճակով: Նոր կոալիցիայի և կառավարության ստեղծման այս նոր փուլի պատճառով սեփականության իրավունքի հանձնման գործընթացը գուցե ուշանա:
Ի դեպ, Նոր զարթօնք կազմակերպությունը շարունակում է հերթապահել որբանոցի տարածքում:
Որբանոցի քանդման աշխատանքների մեկնարկի օրվանից սկսված հերթապահության ակտիվիստներից Նորայր Օլգարը նշում է, որ ճամբար-որբանոցի խնդրի լուծման մասին հայտարարություններն անհիմն են, և ուշադրություն է հրավիրել այն հանգամանքին, որ հերթապահությունը շարունակվում է:
http://www.tert.am/am/news/2015/06/11/turkey/1703986