Դիարբեքիրի Սուրբ Կիրակոս եկեղեցին արժանացել է ԵՄ-ի «Մշակութային ժառանգություն» մրցանակին

Դիարբեքիրում գտնվող հին հայկական Սուրբ Կիրակոս եկեղեցին, որը վերանորոգվել և վերաօծվել էր 2011 թ., արժանացել է ԵՄ-ի «Մշակութային ժառանգություն» մրցանակին: Այդ մասին հաղորդում է Akunq.net-ը` վկայակոչելով թուրքական լրատվամիջոցները:

Աղբյուրի համաձայն` Օսլոյում կայացած արարողությանը Սուրբ Կիրակոս եկեղեցու ներկայացուցչին է հանձնել «Պահպանության ոլորտի մեծ մրցանակը»:

Ըստ աղբյուրի` ժյուրին հատկապես տպավորվել է պահպանությանն ուղղված ջանքերի առումով տեղացիների տված աջակցությունից: Հայ համայնքին պատկանող հուշարձանը վերանորոգելու հանգամանքը մեծապես նպաստել է տվյալ շրջանի բնակչության մեջ խաղաղության և հասարակական ամբողջականության զարգացմանը:

Աղբյուրը նաև հիշեցնում է, որ Սուրբ Կիրակոս եկեղեցին կառուցվել է 1376 թ., Դիարբեքիրի Սուր պատմական շրջանում` հայերի կողմից հոծ բնակեցված Ֆաթիհփաշա թաղամասում, և հայերի կողմից օգտագործվել մինչև 1915 թ. մայիսի 27-ը, երբ սկսվեց այստեղի հայերի ցեղասպանությունը:

Եկեղեցու զանգակատունը բարձր է եղել մզկիթի մինարեներից, որի պատճառով այն թնդանոթի զարկերով ավիրվել է 1915 թ.: Առաջին աշխարհամարտի տարիներին գերմանացի զինվորների համար բանակատեղի ծառայած սույն եկեղեցին հետագայում վերածվել է «Սյումեր» բանկի բամբակի պահեստի: 1960 թ. պատարագների համար վերաբացված եկեղեցին վերստին լքվել է 1980 թ.: 1990-ական թվականների վերջերին ավերակ դարձած եկեղեցին հետագայում վերանորոգվել է Սուրբ Կիրակոս փոքր հայկական եկեղեցու հիմնադրամի և Դիարբեքիրի քաղաքապետարանի կողմից:

Akunq.net