Կոալիցիոն հեռանկարները Թուրքիայում. կուսակցությունների ներկայացուցիչներն անդրադարձել են կառավարության հետագա ճակատագրին

Թուրքիայում կիրակի օրը կայացած խորհրդարանական ընտրությունների արդյունքների հրապարակումից հետո պարզ դարձավ, որ ընտրված 4 կուսակցություններից ոչ մեկը չի կարող միայնակ կառավարություն ձևավորել, և կոալիցիայի ստեղծումը դարձավ ամենաշատ քննարկվող հարցերից մեկը։
Ինչպես տեղեկացնում է «Հուրրիյեթ»-ը, իշխանության և ընդդիմության միջև կոալիցիա ստեղծելու սցենարների վերաբերյալ հայտարարություններ են արվել։
Խորհրդարան մտած երկրորդ ուժի՝ Ժողովրդահանրապետական կուսակցության առաջնորդ Քեմալ Քըլըչդարօղլուն նշել է, որ երկիրն առանց կառավարության թողնելն անարգանք կլինի ընտրողների համար։
«Չորս քաղաքական ուժերն էլ պատասխանատվություն են կրում դրա համար, սակայն երեք ընդդիմադիր կուսակցությունները հատուկ պատասխանատվություն ունեն»,-ասել է նա։
Ազգերի ժողովրդավարական կուսակցության առաջնորդ Սելահեթիին Դեմիրթաշն էլ նշել է, որ Թուրքիայում այժմ երկու հարց պետք է քննարկվի, որոնցից մեկը վարչապետ Ահմեթ Դավութօղլուի հրաժարականն է։
«Վարչապետ Դավութօղլուն պետք է կատարի խոստումն ու հրաժարական տա։ Նա ասել էր, որ եթե միայնակ իշխանություն չկազմի, հրաժարական կտա»,-ասել է նա։
Անդրադառնալով կոալիցիայի մասին հարցին՝ նա նշել է, որ Թուրքիան առանց կառավարության չթողնելու նպատակով Արդարություն և զարգացում կուսակցությունը պետք է կոալիցիա կազմի Ժողովրդահանրապետական կուսակցության հետ։
Ազգայնականների առաջնորդ Դևլեթ Բահչելին էլ նշել է, որ կոալիցիա պետք է կազմեն Արդարություն և զարգացում կուսակցությունն ու քրդական Ազգերի ժողովրդավարությունը, իսկ իրենք պատրաստ են ստանձնել խորհրդարանում ակտիվ ընդդիմության դերակատարությունը։
Կիրակի օրը կայացած խորհրդարանական ընտրությունների արդյունքում իշխող կուսակցությունը հավաքել է ձայների 40.9 տոկոսը և միայնակ կառավարություն ձևավորել չի կարող:
Խորհրդարանական ընտրություններին մասնակցել է 20 կուսակցություն: Քվեարկությանը մասնակցել է ավելի քան 53 մլն ընտրող: Խորհրդարանում ներկայացված լինելու իրավունք ստացել է 4 կուսակցություն:
Քրդամետ Ազգերի ժողովրդավարություն կուսակցությունը պատմության մեջ առաջին անգամ կարողացել է շրջանցել 10 տոկոսանոց արգելքն ու հայտնվել խորհրդարանում:
http://www.tert.am/am/news/2015/06/09/turkey-elections/1701290