Բելգիայի խորհրդարանի ստորին պալատը մտադիր է ճանաչել Հայոց ցեղասպանությունը

Բելգիայի խորհրդարանի ստորին պալատի մեծամասնությունը մտադիր է ճանաչել Հայոց ցեղասպանությունը: Այս մասին RTBF եւ RT հեռուստաալիքներին տված հարցազրույցում հայտարարել է Բելգիայի խորհրդարանի Ներկայացուցիչների պալատի` Բարեփոխական շարժում (MR) խմբակցության առաջնորդ Դենի Դյուկարմը:
Ինչպես հաղորդում է «Արմենպրես»¬ը՝ վկայակոչելով բելգիական RLN պարբերականը, առաջիկայում խմբակցության առաջնորդը համապատասխան բանաձեւի նախագիծ կներկայացնի ստորին պալատի քննարկմանը: Ինչպես պարզվել է՝ Բարեփոխական շարժումը միակ քաղաքական ուժը չէ, որ պահանջում է անհապաղ ճանաչել Հայոց ցեղասպանությունը: Կոալիցիոն մեկ այլ կուսակցություն՝ Ֆլամանդական նոր դաշինքը (N-VA), Հայոց ցեղասպանության ճանաչման վերաբերյալ արդեն ներկայացրել է բանաձեւի նախագիծ, սակայն Դյուկարմը շեշտել է, որ նախագիծը դեռեւս լուրջ մշակման կարիք ունի, քանի որ տեքստում բացակայում է ստորին պալատի կողմից Հայոց ցեղասպանության ճանաչման մասին դրույթը, ինչն, ըստ պարբերականի, Դյուկարմը անվանել է ամենակարեւոր կետը: RLN պարբերականը շեշտում է, որ բոլոր կուսակցություններն էլ ցանկանում են ճանաչել Ցեղասպանությունը, եւ թուրքական ծագմամբ որոշ պատգամավորների վերաբերմունքը վեճերի տեղիք է տալիս:
Պարբերականը հիշեցրել է Ժողովրդավարական մարդասիրական կենտրոն կուսակցության օրինակը, երբ Հայոց ցեղասպանության ճանաչումը մերժող պատգամավոր Մահինուր Օզդեմիրը հեռացվել էր կուսակցության շարքերից: Բելգիայի խորհրդարանն 1998 թվականին Հայոց ցեղասպանությունը ճանաչող բանաձեւ է ընդունել Վերին պալատի (Սենատի) մակարդակով:
Hayernaysor.am