ՀՀ ազգային փոքրամասնությունները ՄԱԿ-ին կոչ են անում դատապարտել Ցեղասպանությունը

Նրա խոսքով՝ դիմումը ստորագրել են ավելի քան 20 մշակութային կազմակերպություն։ «Կարծում եմ, որ դիմումը եւս մեկ անգամ կապացուցի, որ անհրաժեշտ է կանխել պատերազմները, որոնց հետեւանքով ցեղասպանություններ են տեղի ունենում»,- ընդգծեց Խոսրոեւը։
Ասորական համայնքի ներկայացուցիչը բարձրաձայն կարդացել է դիմումի ողջ տեքստը. «Պատասխանատվության զգացումով ներշնչված՝ մենք՝ կազմակերպությունների ներքոստորագրյալ ղեկավարներս, Հայաստանի Հանրապետության տարածքում բնակվող 11 ազգային փոքրամասնությունների ներկայացուցիչներս, Հայոց ցեղասպանության 100-ամյակին միանալով ողջ աշխարհի առաջավոր մարդկության համընդհանուր արժեքներին, քննադատում ենք Օսմանյան կայսրության կողմից հայերի, հույների, ասորիների ցեղասպանության հերքումը եւ պահանջում ենք արդարություն եւ Թուրքիայում ապրող ազգային փոքրամասնությունների իրավունքների վերականգնում։
Որպես ցեղասպանություն վերապրած ազգերի ներկայացուցիչներ՝ կոչ ենք անում ՄԱԿ անդամ երկրների դեսպաններին դատապարտել 100 տարի առաջ Օսմանյան կայսրությունում տեղի ունեցած ցեղասպանություն հանցագործությունը՝ հույս ունենալով, որ մարդկության դեմ գործած այդ ծանրագույն հանցագործությունը կստանա իր արժանի գնահատականը։
Հենց ժխտման հետ համակերպվելու եւ աշխարհաքաղաքական նպատակահարմարությունից ելնելով են խրախուսվում ու տարիների ընթացքում կրկնվում մարդկության դեմ գործած հանցագործությունները, իսկ Թուրքիայի Հանրապետությունում շարունակում են ոտնահարվել մարդու հիմնարար իրավունքները եւ ազատությունները՝ հնարավորություն տալով ժամանակակից Թուրքիայի քաղաքական ղեկավարությանը գործել իրենց նախնիներից փոխառած կոպիտ անսանձության քաղաքականությամբ՝ աստիճանաբար ոչնչացնելով բազմաթիվ ազգային փոքրամասնությունների հոգեւոր, մշակութային եւ նյութական ժառանգության հետքերը։
Հայոց ցեղասպանության 100-ամյակը յուրահատուկ առիթ է առաջավոր մարդկության կողմից քարոզվող համամարդկային արժեքները հիշելու եւ վերոնշյալ աշխարհաքաղաքական շահերը մի կողմ թողնելու համար՝ դրանով իսկ կանխելով նոր ցեղասպանությունները։
Հանուն մեր սերունդների ապահով ապագայի՝ միացե՛ք Հայոց ցեղասպանության 100-ամյակի կարգախոսին՝ «Հիշում եմ եւ պահանջում»։
http://news.am/arm/news/270109.html