Էրդողանի «հոգեզավակ» բելգիացի պատգամավորն իրականում ճանաչել է Ցեղասպանությունը

Բելգիայի թուրքական արմատներով պատգամավոր Մահինուր Օզդեմիրը, որին հեռացրել էին «Ֆրանկոֆոն քրիստոնեական կուսակցությունից» Հայոց ցեղասպանությունը չճանաչելու համար, իրականում ճանաչել է այն, տեղեկացնում է Yeniyon կայքը:
Կուսակցությունից հեռացվելու որոշումը լայն արձագանք էր գտել թուրքական մամուլում: Իշխող Արդարություն և զարգացում կուսակցության մերձավոր շրջանակները դրա դեմ բողոքի ակցիաներ էին կազմակերպել: Դրանցից մեկին մասնակցել էր նաև Թուրքիայի նախագահ Ռեջեփ Թայիփ Էրդողանի դուստրը՝ Սումեյյա Էրդողանը: Սակայն բացահայտվել են փաստաթղթեր, համաձայն որոնց՝ 2014 թվականին Օզդեմիրը 1915-ի դեպքերը որպես ցեղասպանություն է ճանաչել:
Հրապարակված լուսանկարներում երևում է փաստաթղթի տակ նրա ստորագրությունը:
Ի դեպ, Մահինուր Օզդեմիրի մասին խոսելիս Էրդողանը հաճախ նրան իր «հոգեզավակն» է կոչում:
Նշվում է, որ կուսակցությունից նրա հեռացվելու պատճառն իրականում ԱԶԿ-ի պատգամավորների հետ ունեցած սերտ հարաբերություններն են: Եվրոպայի ազգությամբ թուրք պատգամավորները հաճախ են վարվում ԱԶԿ-ի պատգամավորների նման: Հայոց ցեղասպանությունը չճանաչելու փաստը պարզապես պատրվակ է նրան կուսակցությունից հեռացնելու համար, գրում է կայքը։
http://www.tert.am/am/news/2015/06/04/recognize/1696345