Մադրիդում տեղի է ունեցել Անտոնիո Էլորսայի «Ցեղասպանություն. գրառումներ» գրքի շնորհանդեսը

Հունիսի 1-ին Մադրիդի Կոմպլուտենսե համալսարանում տեղի ունեցավ հայտնի իսպանացի լրագրող, հրապարակախոս Անտոնիո Էլորսայի «Ցեղասպանություն. գրառումներ» գրքի շնորհանդեսը՝ ճանաչված իսպանացի պատմաբանների, իրավաբանների և համալսարանի պրոֆեսորական անձնակազմի մասնակցությամբ։ Այս մասին հայտնում են ԱԳՆ մամուլի ծառայությունից:

Գիրքը նվիրված է Ռաֆայել Լեմկինի կողմից «ցեղասպանություն» եզրույթի սահմանմանն ու մեկնաբանմանը, դրա իրավական, քաղաքական և սոցիալական նշանակությանը: Հեղինակը Հայոց ցեղասպանության օրինակով անդրադառնում է ցեղասպանությունների դրդապատճառներին, իրականացման մեխանիզմներին, իրավական ձևակերպումներին, անպատժելիության անթույլատրելիությանն ու դրա վտանգավոր հետևանքներին:

Կոմպլուտենսե համալսարանի գլխավոր քարտուղար, նախկին դատավոր Արասելի Մանխոն-Կաբեսան, ողջունելով ներկաներին, գրքի համար շնորհակալություն հայտնեց Անտոնիո Էլորսային: Ընդգրկուն անդրադարձ կատարեց միջազգային իրավունքով ցեղասպանություն հանցակազմի կագավորմանը, ՄԱԿ-ի Ցեղասպանության հանցագործությունը կանխարգելելու և պատժելու մասին կոնվենցիայի դրույթներին, գործնականում այդ հանցագործության պատժելիությունն ապահովելու բարդություններին:

Իսպանիայի Սահմանադրական դատարանի նախկին անդամ Մանուել Արագոնը ներկայացրեց Իսպանիայի օրենսդրությամբ «ցեղասպանություն» հանցագործության սահմանումը, այդ ոլորտում Սահամանադրական դատարանի կայացրած որոշումները և Իսպանիայի օրենսդրական դաշտում առկա բացերը:

Իր հերթին Կոմպլուտենսե համալսարանի պատմության ամբիոնի տնօրեն Միրտա Նունյեսը խոսեց Հայոց ցեղասպանության թեմայի շուրջ իրենց ամբիոնի կողմից տարվող աշխատանքների մասին՝ կարևորելով Իսպանիայում թեմայի հասարակական հնչեղության ապահովման ու համալսարանական շրջանակներում տեղեկացվածության կարևորությունը:

Քննարկումն ամփոփեց Իսպանիայում ՀՀ դեսպան Ավետ Ադոնցն, ով շնորհակալություն հայտնեց հեղինակին և ներկաներին` ծավալված կարևոր քննարկման համար: Դեսպան Ադոնցը ներկայացրեց Հայոց ցեղասպանության միջազգային ճանաչման կարևորությունը, այս ասպարեզում վերջին զարգացումները, Իսպանիայի տեղեկատվական դաշտում, համալսարանական և գիտական շրջանակներում թեմայի ակտիվ քննարկման անհրաժետությունը, ինչպես նաև Հայոց ցեղասպանության 100-րդ տարելիցի խորհուրդը և նշանակությունը հայ ժողովրդի և միջազգային հանրության համար:

Hayernaysor.am