Դավութօղլուի կերպարանափոխումը. «Սփյուռքը մերն է»-ից մինչև «Թուրքիայի հողերի հանդեպ իրավունքներից խոսողներ»

Թուրքիայի վարչապետ Ահմեթ Դավութօղլուն, անդրադառնալով Ազգերի ժողովրդավարություն կուսակցության համանախագահ Սելահեթթին Դեմիրթաշին, նրան մեղադրել էր քրդական հարցի լուծման հարցում սադրանքի և սփյուռքահայերի հետ «առևտուրի» գնալու համար։

Ստամբուլում լույս տեսնող «Ակօս» շաբաթաթերթի կայքը, սակայն, հիշեցնում է, որ վարչապետը դեռ 3 ամիս առաջ արած հայտարարության ընթացքում ասել էր, թե «հայկական սփյուռքը թշնամի չէ, այն մե՛ր սփյուռքն է»։

Դավութօղլուն Հայոց ցեղասպանության վերաբերյալ Սելահեթթին Դեմիրթաշի խոսքերն է հիշեցրել քրդերին՝ նշելով, որ Դեմիրթաշը քրդերին մեղավոր է համարել ու նրանց անունից ներողություն խնդրել։

«Ձեր պապերին մեղադրող մեկը կարո՞ղ է ձեզ ներկայացնել»,-հարցրել է նա՝ հայտարարելով, որ Դեմիրթաշը ստանձնել է Թուրքիայի հողերի հանդեպ ունեցած իրավունքներից խոսողների խոսնակի դերը։
Ավելի վաղ՝ 2015 թվականի փետրվարին, հայ, հույն, ասորի, հրեա համայնքների ներկայացուցիչների հետ հանդիպման ընթացքում թուրք վարչապետն ասել էր, որ հայկական սփյուռքն օտար չէ։

Նա 20-րդ դարասկզբի առաջին կեսի կոտորածների հետևանքով Թուրքիայից արտերկիր մեկնած քաղաքացիներին Թուրքիա էր հրավիրել։ «Նրանք մեր սփյուռքն են, օտար չեն»,-ասել էր նա։

http://www.tert.am/am/news/2015/05/27/davutoglu/1688531