Թուրքիայի՝ Եւրոմիության (ԵՄ) հարցերով նախարար և գլխավոր բանագնաց Վոլքան Բոզքըրը Գործարար կանանց միություն կազմակերպության անդամների հետ հանդիպման ժամանակ հայտարարել է, որ եթե Եւրոմիությունը Թուրքիայի քաղաքացիների համար չվերացնի վիզային ռեժիմը, ապա իրենք էլ չեղյալ կհամարեն դեռևս 2013-ի դեկտեմբերին Թուրքիայի և Եւրոմիության միջև ստորագրված Ռեադմիսիայի (Հետընդունման մասին) համաձայնագիրը:
Թուրքական «haberler.com» լրատվակայքի հաղոդմամբ՝ Բոզքըրը նշել է, որ իրենք 1980-ից ի վեր զբաղվում են վիզաների վերացման խնդրով, սակայն որևէ արդյունքի չեն հասել:
«Որքան մեզ համար վիզաների վերացման խնդիրն է կարևոր, այնքան էլ Եւրոմիության համար կարևոր է Հետընդունման պայմանագիրը: Ես ասում եմ. եթե վիզաները չվերացնեք, մենք չեղյալ կհամարենք Հետընդունման պայմանագիրը: Իսկապես կչեղարկենք, առանց կատակի»,- նշել է նախարարը:
Բոզքըրը նաև նշել է, որ Եւրոմիությունը մուտքի վիզաները չի վերացնում այն պատճառաբանությամբ, թե այդ դեպքում 25 միլիոն թուրք կմեկնի Եւրոպա: Մինչդեռ, ըստ Բոզքըրի, պատճառներից մեկն էլ այն է, որ վիզաների հետ կապված ծախսերը դեսպանատների համար եկամտի կարևոր աղբյուր են: Դրան ի պատասխան էլ թուրք նախարարն ասել է, որ իզուր է ԵՄ-ում տիրող այդ մտավախությունը, քանզի հիմա Եվրոպայում այլևս աշխատանք չկա: Բոզքըրը, այնուամենայնիվ, հույս է հայտնել, որ Թուրքիայի քաղաքացիների համար Եւրոպա մեկնելու համար շուտով այլևս վիզա չի պահանջվի:
Հիշեցնենք, որ Եւրոմիությունը եւ Թուրքիան Ռեադմիսիայի (Հետընդունման համաձայնագիր) և վիզային ռեժիմի վերացման գործընթացի սկսման վերաբերյալ համաձայնագրեր են ստորագրել դեռևս 2013-ի դեկտեմբերին:
Ռեադմիսիայի համաձայնագրով Թուրքիան պարտավորվել է հետ ընդունել Թուրքիայից ԵՄ տարածք մուտք գործած անօրինական ներգաղթյալներին, որոնք կվտարվեն ԵՄ-ից: Վիզային ռեժիմի վերացման գործընթացի շրջանակներում ստորագրված համաձայնագիրն էլ նախատեսում էր մեղմացնել Թուրքիայի քաղաքացիների համար վիզա ստանալու ընթացակարգերն ու կրճատել շենգենյան վիզա տրամադրելու համար սահմանված ժամկետը:
Համաձայնագրով նախատեսվում է նաև, որ Թուրքիայի քաղաքացիները և Եւրոմիության 28 երկրներ առանց վիզայի այցելելու հնարավորություն կունենան 3-3,5 տարվա ընթացքում:
Leave a Reply