Թուրքիայի ԱԳՆ-ի խոսնակը հայտարարել է, որ ռուսական զորքերը ժամանակին կոտորել են չերքեզներին

Թուրքիայի արտաքին գործերի նախարարության (ԱԳՆ) խոսնակ Թանժու Բիլգիչը հայտարարել է, որ ռուսական կայսրությունը Կովկաս ներխուժելու ժամանակ ոչնչացրել է հազարավոր մարդկանց` այդ թվում նաև չերքեզների:

Ըստ թուրքական «Anadolu» պետական լրատվական գործակալության` Բիլգիչը, պատասխանելով  չերքեզների մասին լրագրողների հարցին, պնդել է, որ երբ «1864թ. մայիսի 21-ին ռուսական զորքերը ներխուժել էին Կովկաս ու օկուպացրել», տեղաբնակ ժողովուրդների դեմ  նախ՝ համակարգային ճնշումներ են իրականացրել, ապա` կոտորածներ: Այդ պատճառով կովկասյան ժողովուրդներից հազարավոր մարդիկ ստիպված գաղթել են Օսմանյան կայսրություն:

Բիլգիչը իր մտահոգությունն է հայտնել, որ վերոնշյալ դեպքերը մինչև հիմա  արձագանք չեն գտել  միջազգային հարթակներում ու չեն ստացել արժանի գնահատական:

«Այդ մեծ ողբերգությանը զոհ գնացածների հիշատակի առջև խոնարհվելով` բոլորին կոչ ենք անում արդար հիշողության վրա հենվենք ու խորհենք, թե ինչպես կարելի է գալիք սերունդներին թողնել ավելի խաղաղ. ավելի համերաշխ ապագա»,-նշել է Թուրքիայի ԱԳՆ-ի խոսնակը:

http://www.ermenihaber.am/am/news/2015/05/22