Հայերի ռազմավարությունը. Թուրքիայի վարչապետի նախկին խորհրդական Մահչուփյանի նոր հոդվածը

Թուրքիայի վարչապետի նախկին խորհրդական, լրագրող Էթյեն Մահչուփյանը «Հայերի ռազմավարությունը» վերնագրով անդրադարձ է հրապարակել The Daily Sabah թուրքական թերթում:
Իր անդրադարձում Մահչուփյանն արձանագրում է, որ ցանկացած համայնքի նման հայերն էլ մարդկանց այն խմբերի կողքին են, ովքեր հայերի վշտերը ամենաարմատական ձևով են բարձրաձայնում: Դա նաև ամենահեշտ ուղին է եղել հայկական Սփյուռքի համար: Եվ դրա պատճառներից մեկն այն է, որ Թուրքիան ժխտում է 1915-ը:
Ըստ Մահչուփյանի` սա ռազմավարություն է, որը երեք մասից է բաղկացած՝ ա. Ճանաչման հարցը իր պատմական համատեքստից հեռացնելը և դա նվազեցնել – հասցնելը ցեղասպանության ընդունմանը, բ. Թուրքիա պետությունը հասցեատեր դարձնելը, որը պետք է ճանաչի, որ կատարվածը ցեղասպանություն էր և գ. ակտիվիզմը բավարար քաղաքականություն համարելը:
Ըստ Մահչուփյանի՝ անհեթեթ է կարծել, թե որոշ երկրների կողմից Հայոց ցեղսպանության ճանաչումը բարի կամքի դրսևորում է: Դա ընդամենը Թուրքիայի հանդեպ նրանց քաղաքականության արտահայտությունն է, բայց ոչ երբեք վերաբերմունքը բուն 1915-ին: Այս կերպ 1915-ը հեռացվել է իր պատմական կոնտեքստից և դարձվել պատեհապաշտական քաղաքականության միավոր:
Նա նկատում է, որ որպես զոհ` հայերը կարծել են, թե իրենց դժբախտության ճանաչումը իրենց իրավունքն է, սակայն պատմությունը արդար դատավոր չէ, և 1915-ի ճանաչման համար հայերը պետք է ճիշտ քաղաքական ռազմավարություն զարգացնեն այսօր:
Մահչուփյանի կարծիքով՝ նման նոր ռազմավարություն հայերի համար կարող է դառնալ այն, որ նրանք ավելի շատ ճանաչում ակնկալեն թուրք հասարակությունից, քան իշխանություններից, և աշխատեն հենց այդ ուղղությամբ:
http://www.tert.am/am/news/2015/05/19/armenians-strategy-Mahcupyan/1679204