Սանկտ Պետերբուրգում թուրքական հյուպատոսությունը հանդգնություն է ունեցել Ռուսաստանից պահանջել հայկական մշակույթին պատկանող պատմական գտածոները: Այս մասին գրում է ֆրանսահայերի Collectif Van պարբերականը՝ վկայակոչելով ամերիկյան California Courrier-ում հրապարակված հայտնի լրագրող Հարութ Սասունյանի հոդվածը: Հրապարակման մեջ ասվում է.
«1916 թվականի ռուսական ռազմարշավի ժամանակ, որը թույլ տվեց ժամանակավորապես ազատագրել Օսմանյան Թուրքիայի արեւելյան հատվածը, Սանկտ Պետերբուրգի Ազգագրության թանգարանը Նիկոլայ II ցարին խնդրել է գիտնականների խումբ ուղարկել Վանի շրջան՝ հնագիտական գտածոները հավաքելու եւ դրանք կործանումից փրկելու համար: Բարեխղճորեն հավաքված մշակութային գտածոները 100 տարի շարունակ նկուղում էին եւ երբեք չեն ցուցադրվել:
Անցյալ շաբաթ դրանք վերջապես ցուցադրվել են Սանկտ Պետերբուրգում: Բնականաբար, Թուրքիայի հյուպատոսությունը, իմանալով, որ Թանգարանը Վանից արժեքավոր մշակութային հուշարձաններ ունի, կապ է հաստատել աշխատակիցների հետ՝ հայտարարելով, որ այդ առարկաները պատկանում են Թուրքական հանրապետությանը, եւ պահանջել է վերադարձնել դրանք:
Թանգարանի ղեկավարությունը մերժել է թուրքական կողմի պահանջները՝ հայտարարելով, որ 1916 թվականին դրանք գնել են տերերից: Հետաքրքիր է, թուրք դիվանագետները հանդգնություն ունեցան պահանջել հայկական մշակույթի այդ մասունքները՝ դրանց տերերին սպանելուց, նրանց տներն այրելուց եւ գույքը յուրացնելուց հետո»:
http://news.am/arm/news/266854.html
Leave a Reply