Անվտանգության ամրագոտին Ձե՛զ էլ կպաշտպանի, մե՛զ էլ, պարո՛ն նախագահ

Արիս Նալջը

Հեռուստատեսությամբ ցուցադրվող սոցիալական գովազդներ կան՝ «Անվտանգության ամրագոտին Ձեզ էլ կպաշտպանի, Ձեր ուղևորներին էլ»: Ահա այս գովազդը նայելու ամեն մի րոպեն սկսել է նախագահին հիշեցնել:
Ինձ զգում եմ դեպի պատն ընթացող մեքենայի մեջ: Ես ուղևորի աթոռին եմ, իսկ ղեկին խելացի վարորդ է՝ ոտքը դրած գազին:
Անվտանգության ամրագոտին չի կապել: Մեքենայի համակարգը անընդհատ «բիփ-բիփ» անելով` նախազգուշացնում է:
Մեքենայի ռադիոյի ձայնը մինչև վերջ բարձրացրել է, որպեսզի նախազգուշացումները չլսի:
«Եղբա՛յր, դու հանգիստ եղիր, Թուրքիայում ամրագոտին միայն վարորդի համար է պարտադիր»՝ ասելով ինձ չի ստիպել, որ ամրագոտին կապեմ: Ավելին` շարունակում է. «Տես օդորակիչը միացրել եմ, դու հանգիստ եղիր: Տեսա՞ր, մենք քո հետ որևէ խնդիր չունենք»: Իսկ ռադիոյով նախագահն է խոսում:
«Գիտեք՝ Վանի Աղթամար կղզու հայկական եկեղեցու վերանորոգման ծախսերն ամբողջությամբ պետական բյուջեից հոգացինք: Գնում են այնտեղ ու պատարագ մատուցում: Այլ վայրերում ևս նմանատիպ պահանջներ են եղել, մենք էլ այդ պահանջները բավարարել ենք»:
Քանի որ 12 տարվա վարորդական փորձին վստահող մեր վարորդը սովոր չէ երկար ճանապարհի, սկսում է քնել: Աչքերը փակվում են, սակայն մի կերպ բացում է՝ ևս մեկ կլիոմետր առաջ, ևս մեկ կլիոմետր…
«Արտաքին մութ ուժեր» անունով ոստիկանը մեր հետից է ընկել. երբ ոտքը գազից հեռացնի, կբռնի մեզ:
Ռադիոյից հնչող ձայնն ասում է՝ «Եվրոմիությունն ինչ որոշում ուզում է կայացնի, մեր մի ականջով մտնելու է, մյուսով` դուրս գալու»:
Վարորդը գիտի, որ ոստիկանն իր հետ այնպես դաժան է վերաբերվելու, ինչպես ինքն ինձ հետ է վարվում: Որպեսզի գազային հարձակման չենթարկվի, ականջները փակ են շչակների ձայների առաջ:
Իսկ «ներքին մութ ուժերը», առջևի լուսացույցի վրա մեծ կարմիր լույս վառելով, նախազգուշացրել են:
Իրականում կատակերգություն է, սակայն կարծում եմ` բավարար է վերջին շաբաթվա ընթացքում տեղի ունեցածը պատմելու համար, քանի որ Ցեղասպանության հարցում նախագահի քայլերը այլևս լուրջ ընդունել անհնար է:
Տարիներ շարունակ «բարենորոգումներ, բարենորոգումներ» կոչող ԵՄ-ն վերջապես գտավ Թուրքիայի աքիլլեսյան գարշապարը: Այո՛, միգուցե և արդար չէ, որ իրենք առանց առերեսվելու սեփական «արյունոտ» պատմության հետ` դիմում են այս քայլին, սակայն, ըստ էության, Թուրքիային հրահրել են ցանկանում: Իսկ մեր Ջումբաբա (թուրքերեն ժողովրդախոսակցական դիմելաձև նախագահին: Նշանակում է հանրապետության հայր-Ակունքի խմբ.) վարորդն էլ, ոտքը գազից չհեռացնելով, ամեն անգամ նմանատիպ հրահրանքներին պատասխանում է՝ «Մենք ոչ քաղաքացի հայերին մեր երկրից վտարու՞մ ենք»:
Հարցերին պատասխաններ…
Էրդողանը նաև հարցեր ունի Եվրոխորհրդարանին, Վատիկանին և Սփյուռքին… Հավանաբար այսօրվա Թուրքիայի վարժարանի սաներն անգամ կարող են տալ ներքոնշյալ պատասխանները:
Իմ երկրում քաղաքացի և ոչ քաղաքացի մոտ 100 000 հայ կա: Տեսնես իրենց երկրներում քանի՞ հայ կա:
Հարգելի՛ պարոն նախագահ, աշխարհում 10 միլիոն հայ կա, որից 2,5-3 միլիոնը բնակվում է Հայաստանում, Ձեր հողերից մազապուրծ փրկված 8 միլիոնն էլ` աշխարհի տարբեր ծայրերում:
Ցայսօր մեր հայ քաղաքացիների նկատմամբ որևէ խտրական, մյուս քաղաքացիներից տարբեր և բացասական վերաբերմունք ցուցաբերե՞լ ենք:
Կարող եմ թվարկել այնպիսի բացասական վերաբերմունք, ինչպիսիք են Հրանտ Դինքի, Սևակ Բալըքչիի սպանությունները, ոչ մուսուլման քաղաքացիների կոդավորումը, ինչպես նաև` Ունեցվածքի հարկը անցյալում, 20 դասակարգ զինվորագրումը, 1955 թ. սեպտեմբերի 6-7 դեպքերը…
Նաև պետք է տարիներ շարունակ Հայաստանի քաղաքացիներին յուրաքանչյուր ընտրություններից առաջ նյութ դարձնող այս հայրենիքում Հայաստանի քաղաքացիներին հարցնել, թե ինչ են մտածում… Անգամ Թուրքիայի նախագահը դեռևս չի թարմացրել ինֆորմացիան, թե Թուրքիայի Հանրապետության հայերն ու Հայաստանի քաղաքացի հայերը ինչ քաղաքացիություն ունեն: Մի քանի տարի առաջ էլ է նույն սխալը թույլ տվել: Մեր թիվը հազիվ 100 հազարի է հասել: Հարգելի՛ պարոն նախագահ, Հայաստանի Հանրապետության քաղաքացիների թիվը մոտ 25 հազար է: Սրանք Աշխատանքի և սոցիալական ապահովության նախարարության ներկայացրած թվերն են…

http://t24.com.tr/yazarlar/aris-nalci/emniyet-kemeri-sizi-de-korur-bizi-de-sayin-cumhurbaskani,11698
Թարգմանեց Անահիտ Քարտաշյանը
Akunq.net