Թուրքիայի իշխող կուսակցությունը կարող է փոխել երիտթուրքական մտածելակերպը Թուրքիայում. Մահչուփյան

Թուրքական «Դեյլի Սաբահ» պարբերականում Թուրքիայի վարչապետի նախկին գլխավոր խորհրդական, հայտնի հայ վերլուծաբան Էթիեն Մահչուփյանն անդրադարձել է Հայոց ցեղասպանության հարցում Թուրքիայի գործող իշխանությունների քաղաքականությունում փոփոխության անհրաժեշտությանը, որից, ըստ հեղինակի, նախևառաջ կշահի պաշտոնական Անկարան:
Մահչուփյանն իր «Հայկական հարցն ու քաղաքական վարչակարգը» հոդվածում նշում է, որ «Հայկական հարցը շարունակում է լինել քաղաքական վարչակարգի հարց, և թեև քեմալականները 1920-ականներին ստեղծեցին մի ավտորիտար ռեժիմ, որը խուսափում է այս հարցի հասցեագրումից, սակայն Արդարություն և զարգացում կուսակցությունը (ԱԶԿ) ունի այն ուժը, որով կարող է փոխել քաղաքական համակարգը՝ քննարկելով այս հարցը մեր օրերում»:
«Հայկական հարցի շուրջ քննարկումները Թուրքիայում կարող են հումանիտար մակարդակում մեծ օգուտներ բերել ԱԶԿ-ին: Այս հարցը կլանում է հայերին, ինչպես և թուրքերին ու քրդերին, ովքեր «մյուս» կողմում են: Այս հարցի պատճառով կողմերն իրարից բաժանվել են, իսկ կողմերի միջև երկխոսությունը կբերի կարգավորման և երկկողմանի քննարկումն ավելի օբյեկտիվ կդարձնի:
Բացի այդ, ԱԶԿ-ն այլ օգուտներ էլ կունենա Հայկական հարցի քննարկումից: Նախ՝ սա լավ հնարավորություն կլինի ԱԶԿ-ի ինքնության համար՝ խուսափելու «ցեղասպանության» ճնշումից: Ինչպես հայտնի է, թեև 1915-ի կոտորածներին մասնակցել են հասարակության տարբեր շրջանակներ, սակայն հենց հավատացյալ մուսուլմաններն են փրկել հայերից շատերին: Իսկ հայկական գույքն անցել է հիմնականում երիտթուրքական ընտանիքներին: Այլ կերպ ասած՝ քննարկումները հնարավորություն կտան այսօրվա հավատացյալ մուսուլմաններին տարբերակել երիտթուրքերից: Իսկ երիտթուրքական մտածելակերպը մշտապես հաստատվել է ռազմական հեղաշրջումների հետևանքով և իր շարունակությունը գտել:
Հայկական հարցում մոտեցման փոփոխությունը թույլ կտա ԱԶԿ-ին ավելի լեգիտիմ հիմքեր ստեղծել ապագայի համար: Եթե մենք փորձում ենք խուսափել քեմալական ավտորիտար աշխարհիկ կառավարումից, ինչպես և ազգայնամոլությունից, որոնց վրա էլ կառուցված է թուրքական ինքնությունը, ապա մենք նոր հոգեբանության կարիք ունենք, որը պետք է պատմական բեկումից սկիզբ առնի»,- գրում է Մահչուփյանը՝ կոչ անելով ԱԶԿ-ին Հայկական հարցում քաղաքականության տեսանկյունից պատմական ու բեկումնային քայլ կատարել:
«Պետք է փաստել, որ Հայկական հարցը դարձել է մի գործիք, որով էլ իրականացվում է ավտորիտար ռեժիմը Թուրքիայում: Փաստը, թե հայերը ցեղասպանություն հասկացությունը դարձրել են առաջնահերթություն, վերջին տարիներին դարձել է այդ վերաբերմունքն արդարացնելու միջոց»:
«Այս ամենից հետո, ինչպես և անցյալում, Հայկական հարցը շարունակում է մնալ քաղաքական վարչակարգի հարց: Նախկինում հայերի հետ խաղաղության հարցը համարվում էր սարսափեցնող ապագա, իսկ այժմ այն, այնուամենայնիվ, պետք է համարվի ցանկալի ապագայի հարց»,- իր հոդվածն այսպես է եզրափակում հայ վերլուծաբանը:
Աղբյուր` Թուրքագիտական պորտալ
AllTurkey.am