Մարդինում քրդերը բողոքի ակցիայով են ընդունել Էրդողանին

2015թ. հունիսի 7-ին Թուրքիայում կանցկացվեն խորհրդարանական ընտրություններ: Թուրքիայի նախագահ Ռեջեփ Թայիփ Էրդողանը շարունակում է նախընտրական քարոզարշավները և հանդիպում հանրության հետ:

Հետաքրքիր միջադեպ է գրանցվել Մարդին քաղաքում․ երբ Էրդողանը Մարդինում անցել է քրդական Ժողովուրդների դեմոկրատական կուսակցության (ԺԴԿ) շենքի մոտով՝ հավաքված բազմությունը՝ շուրջ 100 մարդ, ի նշան բողոքի շրջվել է և մեջքով դիմավորել Թուրքիայի նախագահին: Նրանք հաղթանակի նշաններ են ցույց տվել Էրդողանի ավտոշարասյան ուղղությամբ:

Ըստ Demokrathaber-ի՝ Մարդինում Էրդողանի ցույցին մասնակցողների թիվը շուրջ երեք հազար է եղել: Նա ելույթ ունենալիս ձեռքին պահել է Ղուրանը: Քրդաբնակ այս շրջաններում Էրդողանի և Արդարություն ու զարգացում կուսակցության հիմնական հակառակորդը ԺԴԿ-ն է, այդ պատճառով Էրդողանը քննադատել է կուսակցության գործունեությունը՝ մեղադրելով ահաբեկչությանն օժանդակելու մեջ: «Ահաբեկչությանն աջակցող քաղաքական կուսակցությունը շահագործում է իմ հավատակից քուրդ եղբայրներին: Եկե՛ք միասին վերջ տանք դրան»,- ասել է Էրդողանը:

Էրդողանի նախընտրական ցույցերին շատ քիչ մարդ է եղել քրդաբնակ այլ շրջաններում՝ Բաթմանում, Դիրաբեքիրում և Սղերդում: Դատելով մամուլի հրապարակումներից՝ հարավարևելյան վերոնշյալ շրջաններում Էրդողանի անվտանգությունն ապահովելու համար հավելյալ միջոցառումներ են ձեռնարկվում:

http://civilnet.am/2015/05/06/erdogan-mardin-protest-hdp-kurds-kuran/#.VUnd7I7tmko