Պեկինում տեղի է ունեցել Հայոց ցեղասպանության մասին պատմող գրքի շնորհանդես

Հայոց ցեղասպանության 100-րդ տարելիցին նվիրված միջոցառումների շրջանակներում ապրիլի 29-ին Պեկինի «Bookworm» գրախանութում կայացել է ամերիկահայ գրող Դեյնա Ուոլրաթի` Հայոց ցեղասպանության մասին պատմող “Like Water on Stone” գրքի շնորհանդեսը, հաղորդում են Չինաստանում ՀՀ դեսպանատնից:

Ներկայացնելով գրքի ստեղծման նախապատմությունը՝ Դեյնա Ուոլրաթը մանրամասնորեն պատմել է դարասկզբին Արևմտյան Հայաստանի տարբեր շրջաններում կատարված ոճրագործությունները:

Միջոցառմանը ներկա են գտնվել դիվանագետներ, չինացի գրականագետներ և լրագրողներ:

“Like Water on Stone” գիրքը պատմում է 14-ամյա Շահեն և Սոսի երկվորյակների մասին, ովքեր մոգական Արծվի օգնությամբ Ցեղասպանությունից փրկվելու համար փախչում են լեռները, երբ Օսմանյան կայսրությունում սկսվում են հայերի զանգվածային կոտորածները:

Ամերիկահայ գրող Դեյնա Ուոլրաթն իր ելույթում կարևորել է Հայոց ցեղասպանության իրողությունը օտարերկրյա լսարանին գեղարվեստական գրականության միջոցով հասանելի դարձնելը:

Միջոցառման ավարտին ներկաները բազում հարցեր են ուղղել հեղինակին: Առաջիկա օրերին հեղինակը գիրքը կներկայացնի նաև Պեկինի մի շարք այլ հաստատություններում:

http://armeniangenocide100.org/book-on-armenian-genocide-presented-in-beijing/