Հայոց ցեղասպանության զոհերի սրբադասման արարողությունը Սանկտ Պետերբուրգի Սբ Կատարինե եկեղեցում

2015թ. ապրիլի 23-ին՝ Օսմանյան կայսրությունում Հայոց ցեղասպանության 100-րդ տարելիցի շեմին, Ցեղասպանության նահատակներին սրբադասելու արարողությանը համայն հայությունը միավորվեց միասնական աղոթքով:

Սրբադասման արարողությունը տեղի ունեցավ համայն հայության հոգևոր կենտրոն Սբ. Էջմիածնում, որին հնարավորություն ունեին ուղիղ եթերով հետևել բոլոր հայկական եկեղեցիներում:

Սանկտ Պետերբուրգի Սբ Կատարինե հայկական եկեղեցում քահանա Սարգիս Չոփուրյանի գլխավորությամբ ուղիղ հեռարձակմանը հետևում էին Սանկտ Պետերբուրգի հայ համայնքի անդամները, Սանկտ Պետերբուրգում ՀՀ գլխավոր հյուպատոս Գ. Կարապետյանը:

Համերաշխության այցով իրենց ներկայությամբ հայ ժողովրդի հետ զոհերի հիշատակը հարգեցին Կազանսկի տաճարի ավագ երեց Պավել Կրասնոցվետովը, Սանկտ Պետերբուրգի Սբ Կատարինե կաթոլիկ եկեղեցու քահանա Յուրի Դորոգինը, Սբ Պետրոս և Պողոս լյութերական եկեղեցու քահանա Միխայիլ Շվարցկոպֆը, Սանկտ Պետերբուրգի ադմինիստրացիայի Կրոնական միավորումների վարչության պետ Վ. Գ. Իվանովը:

Ժամը 19:15-ին երևանյան ժամանակով, որը խորհրդանշում էր 1915 թվականը, հնչեցին Սբ Էջմիածնի և բոլոր հայկական եկեղեցիների զանգերը: Զանգերը ղողանջեցին ուղիղ 100 անգամ, որն էլ խորհրդանշում էր 100-րդ տարելիցը: Զանգերի ղողանջն ուղեկցվեց 1 րոպե լռությամբ: Արարողությունն ավարտվեց «Հայր մեր» տերունական աղոթքով և եկեղեցական հիմնով: Սբ Կատարինե հայկական եկեղեցու զանգերին զուգահեռ` ղողանջեցին նաև քաղաքի մյուս եկեղեցիների զանգերը:

Սրբադասման արարողության ավարտին եկեղեցու բակում «Նոր սերունդ» երիտասարդական կազմակերպությունը մոմավառություն կազմակերպեց՝ ի հիշատակ Ցեղասպանության անմեղ զոհերի: