«Los Angeles Times». Ինչո՞ւ է Հայոց ցեղասպանության ճանաչումը դժվար խնդիր մնում

NEWS.am-ը զգալի կրճատումներով ընթերցողի ուշադրությանն է ներկայացնում լրագրող Չադ Գարլանդի՝ «Los Angeles Times»-ում հրապարակված հոդվածը:

Երբ անցյալ շաբաթ ավստրիական խորհրդարանում կուսակցությունները հռչակագիր ստորագրեցին՝ 1915 թվականին Օսմանյան կայսրությունում հայերի կոտորածը Ցեղասպանություն կոչելով, Թուրքիան հանդես եկավ հայտարարությամբ, որ դա «անջնջելի հետք կթողնի թուրք-ավստրիական բարեկամության վրա», եւ հետ կանչեց Վիեննայում իր դեսպանին: Երբ Հռոմի Ֆրանցիսկոս Պապը միջազգային հանրությանը կոչ արեց այդ վայրագությունները «20-րդ դարի առաջին ցեղասպանություն» կոչել, Թուրքիան նրա հայտարարությունը «ոչ մի ուժ չունեցող» կոչեց եւ հետ կանչեց նաեւ Վատիկանում իր դեսպանին:

ԱՄՆ Ներկայացուցիչների պալատի անդամ Ադամ Շիֆը «Times Community News»-ին ասաց, որ Թուրքիային բնորոշ է սպառնալիքներով հանդես գալը, երբ որեւէ պետություն Առաջին աշխարհամարտի տարիների կոտորածները ցեղասպանություն է որակում, սակայն դա «այդ պետություններից ոչ մեկի հետ հարաբերությունների դադարեցման չի հանգեցրել»:

Ավելի քան 20 երկրներ արդեն ճանաչել են Հայոց ցեղասպանությունը: Դրանց թվում են Ֆրանսիան, Կանադան եւ Ռուսաստանը, բայց ոչ Իսրայելն ու Միացյալ Թագավորությունը: Վերջերս ԱՄՆ-ում դաշնային մակարդակով ցեղասպանությունը ճանաչելու փորձերը հաջողությամբ չպսակվեցին: Այդ վայրագությունների տարելիցի առիթով հղած ուղերձում նախագահ Բարաք Օբամայի կողմից «ցեղասպանություն» եզրույթը չարտասանելու մասին որոշման շուրջ Սպիտակ տան պաշտոնական պարզաբանման մեջ նշվում էին ՆԱՏՕ-ում դաշնակից Թուրքիայի հետ հարաբերությունները:

ԱՄՆ արդարադատության նախարարության տվյալներով, Թուրքիան վերջին մի քանի տարիներին միլիոնավոր դոլարներ է ծախսել՝ ամերիկյան պաշտոնյաների շրջանում սեփական տեսակետը քարոզելու համար:
Մասաչուսեթս նահանգի Քլարք համալսարանի պատմության պրոֆեսոր Թաներ Աքչամը, որը մասնագիտանում է Հայոց ցեղասպանության ոլորտում, նշել է, որ դա ոչ միայն «ցեղասպանություն» եզրույթի խնդիրն է, այլեւ Թուրքայի կողմից ժխտման, որ հայերի դեմ հանցագործություն է իրականացվել:

Ծագումով Թուրքիայից Աչքամի խոսքով, Անկարան կարող է մի քանի ամսով հետ կանչել իր դեսպաններին, «հետո՞ ինչ»: Նրա կարծիքով, դա միայն ավելի կմեկուսացնի նրանց, երկիրը չի կարող սատարել նման դիրքորոշումը: «Նրանք չեն կարող շարունակել ժխտել պատմական փաստը: Անձամբ ես կարծում եմ, որ Թուրքիան շատ լծակներ չունի»,- ասել է Աչքամը:

Շիֆն իր հերթին նշել է, որ ժխտողականությունը Թուրքիայի «հոգեբանության» մասն է դարձել, եւ հանցագործության ճանաչումը «կործանարար» կլինի նրանց համար: Սակայն, նրա խոսքով, վերջապես եկել է ժամանակը, երբ հարկավոր է ճանաչել Ցեղասպանությունը, այն բանից հետո, երբ ԱՄՆ-ն «տասնամյակներ շարունակ կատարել է նրանց ցանկությունը»:

http://news.am/arm/news/264405.html