Սանկտ Պետերբուրգի հայ համայնքի միջոցառումները սկսեցին քաղաքի Սբ Կատարինե եկեղեցում` երախտագիտության աղոթքով: Եկեղեցու բակում խաչքարին ծաղիկներ դնելուց հետո հավաքվածները երթով շարժվեցին դեպի քաղաքի կենտրոնում տեղակայված Մարսովոյե պոլե այգի՝ «Հիշում ենք և պահանջում» խորագրով ցույցին մասնակցելու: Ցույցին հայ ժողովրդին իրենց համերաշխության և ցավակցանքի խոսքը հայտնեցին քաղաքի այլ համայնքի ղեկավարներ, պաշտոնյաներ ու մշակութային գործիչներ:
Հիշատակի և ոգեկոչման արարողությունը եզրափակվեց ցուցահանդեսով, որը տեղի ունեցավ Սանկտ Պետերբուրգի Նկարիչների միության մեծ դահլիճում՝ «Հայկական քաղաքակրթությունը մեծ մշակույթների արտացոլման մեջ» խորագրով: Ցուցահանդեսին ցուցադրված էին 1900-1912 թթ. կատարված լուսանկարները՝ Պետական ֆոտոարխիվից և Ռուսաստանի Գիտությունների ակադեմիայի նյութական մշակույթի պատմության ինստիտուտի արխիվից:
Ցուցադրված նկարները ներկայացնում էին Հին Հայաստանի քաղաքակրթությունը: Գրական մասը, որը հիմնված էր հայ պատմաբանների աշխատությունների և եվրոպական գիտնականների կատարած ուսումնասիրությունների վրա, պատմում էր հայ էթնոսի և հայկական քաղաքակրթության ձևավորման փուլերի մասին:
Ցուցահանդեսը ներկայացնում էր նաև Հայաստանում քրիստոնեության ընդունման և Ցեղասպանության պատմությունից դրվագներ: Այն թույլ էր տալիս ընդհանուր պատկերացում կազմել մի քաղաքակրթության մասին, որն առնչվել է շումերների, ասորիների, խեթերի, Բաբելոնի, Պարսկաստանի, Հունաստանի, Հռոմի և Բյուզանդիայի մշակույթների հետ:
Հավաքածուի մեջ ընդգրկված էին նաև Բորիս Բարատովի կողմից գրված տեքստեր, նկարներ և արխիվային նյութեր:
Անահիտ Քարտաշյան
Սանկտ Պետերբուրգ
Akunq.net
Leave a Reply