Ցեղասպանությունը կանխամտածված ու միտումնավոր է եղել. Թուրքիայի քրդամետ կուսակցության հայ թեկնածու

Թուրքիայում հունիսին նախատեսվող խորհրդարանական ընտրություններին քրդամետ Ժողովուրդների դեմոկրատիա կուսակցության ներկայացուցիչ, ազգությամբ հայ Կարո Փայլանը մեկնաբանել է Թուրքիայի փոխվարչապետ Բյուլենթ Առընչի այն հայտարարությունը, թե «ցեղասպանություն միտումնավոր չեն իրագործել», տեղեկացնում է Biyanet-ը:

«Առընչն ասում է, որ մտածված ցեղասպանություն չեն արել, սակայն պետությունը գիտակցված է այդ հանցանքն իրագործել: Թուրքիայի հանրությանն արդեն 4-րդ սերունդն է՝ խաբում են: Մենք ոչ թե Թուրքիայի հանրությանը, այլ այդ ժամանակաշրջանի իշխանությանն ենք մեղադրում»,-ասել է նա:
Հայ թեկնածուն նաև մեկնաբանել է վարչապետ Ահմեթ Դավութօղլուի հայտարարությունը:

«Դավութօղլուն օգտագործում է «անմեղ հայեր» արտահայտությունը: Ինչպես այժմ բոլոր ազգերը հավասարության կռիվ են տալիս, այդ ժամանակ էլ այդ պայքարը մղող հայեր կային: «Անմեղ հայեր» ասելը նշանակում է, որ հավասարության համար պայքարող մարդիկ դեռ «մեղավոր մարդիկ» են համարվում, և նրանց կարելի է սպանել»,-ասել է նա:

Անդրադառնալով նախագահ Ռեջեփ Թայիփ Էրդողանի հայտարարությանը, թե հայերն իրենք են բացել տեղահանության դուռը, Փայլանն ասել է. «Այսինքն՝ դա նշանակում է, որ այսօր էլ իրավունքների համար պայքարող ժողովրդին կարելի է կոտորել կամ նրանք արժանի են, որ երկրից արտաքսվե՞ն»:

http://www.tert.am/am/news/2015/04/22/turky/1654564