Ցեղասպանության դեմ հանդես եկողների միությունը Ֆրանկֆուրտում բողոքի ակցիա է իրականացրել Թուրքիայի հյուպատոսարանի առջև

Միության անդամներն արդարություն են պահանջել ցեղասպանության զոհերի և վերապրածների համար:

Սույն թվականի ապրիլի 18-ին, ժամը 11:00-ին Ցեղասպանության դեմ հանդես եկողների միության (Soykırım Karşıtları Derneği /SKD/) անդամները և համակիրները Գերմանիայի Ֆրանկֆուրտ քաղաքում բողոքի ակցիա են իրականացրել  Թուրքիայի հյուպատոսարանի շենքի առջև և իրենց վրդովմունքն արտահայտել Թուրքիայի Հանրապետության` 1915 թ. ցեղասպանությունը ժխտելուն ուղղված քաղաքականության կապակցությամբ: Ցեղասպանության զոհերի հիշատակին մեկ րոպե լռությամբ հարգանքի տուրք մատուցելուց հետո միության անունից ելույթ է ունեցել նախագահ Ալի Էրթեմը, ով մասնավորապես ասել է. «Հարգելի բարեկամներ, արդեն մի քանի տարի է, ինչ մեր կազմակերպության անդամները պահանջում են, որ 1915 թ. ցեղասպանության պատմությունը ժխտելու պատճառով մեր ապագան ստի և զրպարտանքի վրա հիմնել ցանկացող Թուրքիայի Հանրապետության պետությունը վերջ դնի իր հակամարդկային քաղաքականությանը և ճանաչի ցեղասպանությունը: Մենք տարիներ շարունակ պահանջել ենք և պահանջում ենք, որ Թուրքիան վերջ դնի ցեղասպանությանը զոհ դարձած ժողովուրդների (հայ, ասորի, հույն և եզդի) դեմ իր ցեղասպան քաղաքականությանը և ներողություն խնդրի այդ ժողովուրդներից: Սակայն Թուրքիայի Հանրապետության իրավասու պաշտոնյաները շարունակում են ավելի ագրեսիվ կերպով ցեղասպանության քարոզչություն անել:

Այն փաստը, որ ամեն տարի մարտի 18-ին նշվող «Դարդանելի հաղթանակի» տարեթիվը փոխվեց ապրիլի 24-ի, ավելին` անգամ Հայաստանի նախագահ Սերժ Սարգսյանին հրավիրեցին մասնակցելու «Չանաքքալեի հաղթանակին» նվիրված տոնակատարություններին, ցույց տվեց, թե Թուրքիայի Հանրապետության իրավասու պաշտոնյաները որքան են անհաղորդ բարոյական նորմերին և ամեն տեսակի մարդկային արժեքներին: Ցեղասպանության քաղաքականության հարցում համառություն ցուցաբերելով` մարդկությանը մարտահրավեր նետելու գինը շատ ծանր է լինում: Պատմության մեջ դրա ամենավառ օրինակը նացիստական տգիտության կործանումն է: Մենք մեկ անգամ էլ ենք Թուրքիայի պետության պաշտոնյաներին զգուշացնում` քանի դեռ ուշ չէ, պահանջում ենք ցեղասպանության ճանաչում և զոհ դարձած ժողովուրդներից ներում հայցում: Մենք արդարություն ենք պահանջում ցեղասպանության զոհ ժողովուրդների համար»:

Ալի Էրթեմի խոսքից հետո ելույթ ունեցավ այդ օրերին տեղի ունեցած մի համաժողովի մասնակցելու նպատակով Ֆրանկֆուրտում գտնվող Արևմտահայոց հարցերի ուսումնասիրության կենտրոնի աշխատակից Մելինե Անումյանը, ով անդրադարձավ ցեղասպանության տարիներին պոլսահայ մտավորականությանը ոչնչացմանը: Ելույթ ունեցան նաև միության այլ անդամներ և համակիրներ:

Akunq.net