Թուրքերին պետք է ասել, որ եկել է ճշմարտությունն ասելու ժամանակը. Շառլ Ազնավուր

Աշխարհահռչակ ֆրանսահայ շանսոնյե, երգահան, գրող, պոետ և դերասան Շառլ Ազնավուրը ռուսական Առաջին ալիքի եթերում հյուրընկալվել է Վլադիմիր Պոզներին։

Շանսոնյեն «Պոզներ» հաղորդման ընթացքում նշել է, որ ապրիլի 24-ին անպայման գնալու է Երևան՝ Հայոց ցեղասպանության զոհերի հիշատակին նվիրված միջոցառումներին մասնակցելու։ «Չի կարելի անտեսել այն, ինչ եղել է։ Թուրքերին պետք է ասել, որ եկել է ճշմարտությունն ասելու ժամանակը»,- նշել է նա։

Երգչի կարծիքով՝ թուրքերը հրաժարվում են ընդունել ցեղասպանությունը 2 պատճառով. «Նրանք չեն կարող ընդունել դա որպես փաստ, քանի որ նրանց գլխավոր բառը դա պատիվն է, և դա կարելի է ինչ-որ կերպ հասկանալ։ Սակայն կա նաև մեկ այլ բան՝ մարդիկ շատ են հարստացել այն ամենի հաշվին, ինչ պատկանել է հայերին, իսկ հետագայում այդ մարդիկ հայտնվել են կառավարությունում։ Այսօր այդ մարդիկ արդեն չկան, սակայն այն ժամանակ նրանք եղել են կառավարությունում։ Դա ընդունելը դժվար է։ Ես հասկանում եմ նրանց դիրքորոշումը, սակայն ընդունել դա չեմ կարող»,- հայտարարել է Ազնավուրը։

Ընդ որում՝ անձամբ Ազնավուրը ոչ մի ատելություն չի տածում թուրքերի հանդեպ, և դա նրան սովորեցրել է մայրը, ով Ցեղասպանության ընթացքում կորցրել է ամբողջ ընտանիքը։ «Մայրս ատելություն չուներ թուրքերի հանդեպ, նա միշտ ասում էր, որ թուրքերի մեջ էլ լավ մարդիկ կան։ Ինձ սովորեցրել են չստել, չատել, մարդկանց մասին վատը չխոսել, դա կարևոր է»,- ասել է նա։

Երգիչը բարձր է գնահատել Հռոմի պապի հայտարարությունն այն մասին, որ Հայոց ցեղասպանությունը եղել է 20-րդ դարի առաջին ցեղասպանությունը։ «Հռոմի պապն այն եզակի մարդկանցից է, ովքեր ասում են ճշմարտությունը, աջակցում են ճշմարտությանը՝ անկախ ամեն ինչից, չվախենալով ոչնչից, առանց վախի և նախատինքի»,- նշել է Շառլ Ազնավուրը։

Շանսոնյեն ու Պոզներն անդրադարձել են նաև այլ թեմաների։ Մասնավորապես՝ իր երկարակեցության մասին հարցին նա պատասխանել է. «Ես ապրում եմ նորմալ կյանքով, ես լավատես եմ, ոչ մի բանի համար չեմ անհանգստանում»։

Շանսոնյեն խոստովանել է, որ դիետա չի պահում։ Նա նշել է, որ պետք չէ ուտել աղ, շաքար, յուղային ուտեստներ, իսկ ինքն ամեն ինչ ուտում է։ Շանսոնյեն նշել է նաև, որ չի զբաղվում սպորտով, սակայն միշտ փորձում է մեջքն ուղիղ պահել։ «Երբ սկսում ես կծկվել, սկսում ես քարշ տալ ոտքերդ, բացի այդ, միշտ պետք է ստեղծել այնպիսի տպավորություն, որ քեզ մոտ ամեն ինչ կարգին է։ Դա շատ կարևոր է, քանի որ դու ոգևորում ես մյուսներին և ինքդ քեզ»,- կարծում է Ազնավուրը։

Նրա խոսքով՝ իր համար անհասկանալի է, թե որտեղից է ուժ ստանում։ «Ես պարզապես անհաջողակ չեմ, կան ի ծնե անհաջողակ մարդիկ, իսկ ես անհաջողակի հակադրությունն եմ»,- ասել է Ազնավուրը՝ նշելով, որ ինքը կասկածամիտ մարդ է, սակայն դա չի բարդացնում իր կյանքը, այլ ընդհակառակը։

«Երբ դու գիտես, որ հնարավոր է ցանկացած դժբախտություն, դու հանգիստ ես և պատրաստ աշխատել, որպեսզի ազատվես այդ դժբախտությունից։»,- ասում է Ազնավուրը։

Եվ վերջում Պոզների այն հարցին, թե եթե նա հանդիպի Աստծուն, ինչ կասի, Ազնավուրը պատասխանել է՝ «Ես նրան կասեմ՝ ողջույն։ Ի՞նչ կարող եմ ասել ավելին։ Եվ հետո, նա պետք է խոսի, քանի որ ես, միգուցե, սխալներ եմ գործել Երկրի վրա, սակայն նա նույնպես քիչ սխալներ չի գործել։ Անհրաժեշտ է, որ նա ինձ բացատրի դրանք»,- ասել է շանսոնյեն։

«Ես չգիտեմ՝ հավատում եմ Աստծուն, սակայն կարծում եմ, որ նա, ում անվանում են Աստված, կարող է տալ մեզ այն ամենը, ինչ անհրաժեշտ է»,- նշել է երգիչը

http://www.tert.am/am/news/2015/04/21/aznavour/1652542