Իտալական օրաթերթ. Հրեական լոբբին օգնում է Կոնգրեսում Ցեղասպանության ճանաչմանը

Հրեական լոբբին ամերիկյան Կոնգրեսում Հայոց ցեղասպանության ճանաչման հարցում սկսել է աջակցել հայկական լոբբիին: Այս մասին գրում է իտալական «Panorama»-ն:

Թուրքիան առաջին անգամ չէ, որ իր դեսպանին հետ է կանչում՝ «խորհրդակցությունների համար»: Այսպես` 2010 թվականի մարտին Անկարան հետ կանչեց Վաշինգտոնում իր դեսպանին, երբ Կոնգրեսի Ներկայացուցիչների պալատի արտաքին հարաբերությունների հանձնաժողովը Թուրքիայում Հայոց ցեղասպանության մասին բանաձեւ ընդունեց:

«Հայոց ցեղասպանության թեման միշտ ազդել է բարեկամ եւ դաշնակից երկրների հետ Թուրքիայի հարաբերությունների վրա: Այդ պատճառով մինչ օրս Հայոց ցեղասպանությունը ճանաչել են միայն երկու տասնյակ երկրներ, այդ թվում՝ Իտալիան:

Հռոմի Պապի հայտարարությունը նախորդեց ոչ միայն Հայոց ցեղասպանության տարելիցին, այլեւ Թուրքիայում նախանշված խորհրդարանական ընտրություններին (հունիսի 7-ին): Ամրապնդվում է տպավորությունը, որ Բերգոլիոյի պապությունն ավելի ու ավելի «քաղաքական» դառնում:

Ինչ վերաբերում է ԱՄՆ-ին, ապա ամերիկյան դիվանագիտությունը միշտ ձգտել է չսրել Անկարայի հետ հարաբերությունները: Բավական է հայացք նետել Wikyleaks-ի հրապարակումներին՝ հասկանալու համար, թե ինչպիսի խուճապի կմատնվեր Պետքարտուղարությունը, եթե Կոնգրեսը Հայոց ցեղասպանության մասին բանաձեւ ընդուներ:

1915 թվականի իրադարձությունները ցեղասպանություն կոչելու՝ Միացյալ Նահանգների ցանկացած որոշում, ինչպես 2010 թվականին գրել է ԱՄՆ դեսպան Ջեյմս Ջեֆրին, կարող է Թուրքիայում քաղաքական բուռն արձագանք առաջացնել, եւ «երկկողմ հարաբերություններում հետեւանքները, այդ թվում՝ քաղաքական, պաշտպանական եւ առեւտրի ոլորտներում, աղետալի կլինեն»:

304-րդ բանաձեւի (Հայոց ցեղասպանության մասին – խմբ.) օգտին քվեարկել չհաջողվեց, այդ թվում՝ այն ժամանակվա պետքարտուղար Հիլարի Քլինթոնի ճնշման արդյունքում: Ներկայացուցիչները պալատը միշտ զգայուն է եղել հայկական լոբբիի գործողությունների հանդեպ, որին վերջերս միացել է նաեւ հրեականը՝ Անկարայի եւ Թել Ավիվի հարաբերությունների վատթարացման պատճառով: Ներկայում բանաձեւը, որը նախագահ Բարաք Օբամային կոչ է անում ճանաչել Հայոց ցեղասպանությունը, սպասում է Կոնգրեսի վավերացմանը»:

http://news.am/arm/news/262394.html