Կնեսետի անդամ. Ոչ մի սարսափելի բան տեղի չի ունենա, եթե մենք ժեստ անենք հայերին

Իսրայելը պետք է 1915-ին տեղի ունեցած կոտորածների հետ կապված սգո պահին կանգնի Հայաստանի կողքին, թեեւ նա պաշտոնապես չի ճանաչել դա որպես ցեղասպանություն: Այս մասին հայտարարել է  Իսրայելի խորհրդարանի անդամ Նահման Շայը՝ հաջորդ շաբաթ Երեւան կատարելիք իր այցելությունից առաջ:

Ինչպես գրում է «The Jerusalem Post»-ը, Հայոց ցեղասպանության 100-րդ տարելիցի առթիվ, ապրիլի 24-ին Երեւանում կայանալիք պաշտոնական արարողությանը ներկա կլինեն Կնեսետի անդամներ Նահման Շայը եւ Անաթ Բերկոն: «Դա խորը պատմական նշանակության իրադարձություն է: Առաջին անգամ վերջին 100 տարում միջազգային հանրությունը, վերջապես, ճանաչում է մեծ անարդարությունը: Ազգային տեսանկյունից եւ մարդասիրական նկատառումներից ելնելով ճիշտ է կանգնել մի ազգի կողքին, որը նման տանջանքներ ու կոտորածներ է տեսել»,-ասել է Շայը:

Նա 1915-ի դեպքերն անվանել է «հայկական Հոլոքոստ»՝ նշելով, որ «հրեա ժողովրդին երբեմն դուր չի գալիս, երբ այլ ժողովուրդներ օգտագործում են «հոլոքոստ» բառը, սակայն, դա անկասկած, այդպիսին է եղել»: «Դա նման է նրան, ինչ նացիստներն արել են հրեաներին հետ»,-հավելել է պատգամավորը:

ՀՀ կառավարությունը պաշտոնական պատվիրակությամբ այդ միջոցառումներին ներկա լինելու հրավեր է ուղարկել Իսրայելին, եւ Իսրայելի ԱԳՆ-ն խնդրել է Կնեսետին երկու պատգամավոր ուղարկել: Սակայն, ինչպես հայտարարել է Իսրայելի ԱԳՆ մամուլի քարտուղար Էմանուել Նահշոնը, դա չի նշանակում, որ կառավարությունը փոխել է իր քաղաքականություն, որը պաշտոնապես չի ճանաչում Ցեղասպանությունը:

«Դա, իհարկե, Հայաստանի հետ բարեկամության ու համերաշխության ժեստ է»,-ասել է նա:

Նահման Շայը պարզաբանել է, որ կառավարությունը քայլում է դիվանագիտության լարի վրայով, քանի որ դեռ հույսը չի կորցրել, որ Թուրքիայի հետ հարաբերությունները կվերականգնվեն: Նրա խոսքով Կնեսետի պատգամավորներին Երեւանում կայանալիք արարողությանն ուղարկելը «փոխզիջում է եւ դա նորմալ է»:

«Ոմանք ասում են, որ Հոլոքոստ ապրած ժողովուրդը չի կարող աչք փակել մեկ այլ ժողովրդի հոլոքոստի առջեւ, սակայն գոյություն ունի նաեւ իրական քաղաքականություն: Մենք փոքր երկիր ենք եւ չենք կարող անընդհատ պայքարել բոլորի դեմ»,-նկատել է խորհրդարանականը:

Կնեսետի անդամը երկու պատգամավոր ուղարկելու որոշումն անվանել է «հասուն որոշում Իսրայելի կողմից»` գիտակցելով, որ «ոչ մի սարսափելի բան տեղի չի ունենա, եթե մենք ժեստ անենք հայերին»:

«Թուրքերը կարող են կատաղել, բայց մենք չենք կարող աչք փակել 100 տարի անց: Իսրայելը եւ հրեա ժողովուրդը չենք կարող անտեսել հայ ժողովրդի հոլոքոստը»,-հայտարարել է Շայը:

http://news.am/arm/news/262157.html