Մինչ թուրք պաշտոնյաները շարունակում են քննադատել Հռոմի պապի հայտարարությունը, որով նա Հայոց ցեղասպանությունը համարել էր 20-րդ դարի առաջին ցեղասպանություն, Թուրքիայի վարչապետ Ահմեթ Դավութօղլուի հայ խորհրդական Էթյեն Մահչուփյանի հայտարարությունը Թուրքիայում մեծ աղմուկ է բարձրացրել, տեղեկացնում է Haberler կայքը:
«Բոսնիայում և Աֆրիկայում տեղի ունեցածը որպես ցեղասպանություն ընդունել, իսկ 1915-ին հայերի դեմ իրականացվածը ցեղասպանություն չկոչելն անհնար է»,-ասել է Մահչուփյանը:
Նա նշել է, որ ցեղասպանության մասին հայտարարությամբ Վատիկանն ազատվել է 100-ամյա հոգեբանական բեռից: «Փոխանակ մտածենք, թե ինչո՞ւ է 100 տարի անց այդ բառն օգտագործել, պետք է հակառակ կողմից նայենք՝ այսքան տարի ինչպե՞ս է դիմացել և չի ասել: Վատիկանը նման բան վաղուց կարող էր ասել, բայց չէր ասում»,-ասել է նա:
Նա կոչ է արել Վատիկանի հայտարարության մեջ քաղաքական կողմ չփնտրել: «Թե՛ հայերի, թե՛ հայ չեղողների համար այդ բառն արդեն քաղաքական լինելուց ավելի հոգեբանական նշանակություն ունի»,-ասել է նա:
http://www.tert.am/am/news/2015/04/15/1915/1646575
Leave a Reply